Dorëheqja e Skënder Gegës ka sjellë një revoltë të mirëfilltë te tifozët e Partizanit, të cilët kanë mbushur rrjetet sociale me akuza ndaj klubit dhe drejtuesve të tij për mënyrën se si po veprohet me të kuqtë.
Grupimi “Baza 46”, ka dalë me një reagim, ku i është kundërvënë emrave të veçantë brenda organikës së klubit, me akuza për përfitime personale në dëm të të kuqve.
Tifogrupi ka përmendur emrin e Arbër Abilaliajt në veçanti duke e akuzuar se ka marrë e larguar lojtarë veç për përfitime personale sipas marrëveshjeve të fshehta që ai ka bërë me lojtarë e agjentë lojtarësh.
Reagimi:
Duke marrë shkas nga largimi i profesor Skënder Gegës (pa u zgjatur shumë te figura e nderuar dhe e respektuar e tij në futbollin shqiptar dhe në veçanti te Partizani që edhe kjo deklaratë të mos duket thjesht e ndikuar emocionalisht) besoj se ka ardhur momenti që disa gjëra t’i themi akoma më qartë për tifozerinë tonë dhe opinionin publik meqenëse edhe reagimet tona të shkuara (të kujdesshme për mos të rritur presionin gjatë rrugës për arritjen e objektivave) kanë shkuar në vesh të shurdhët.
Pas shpalljes kampion në sezonin 2022-2023 Partizani përsëri atëherë kur duhet të niste një cikël shkarkoi trajnerin Kolela dhe drejtorin Marini, kështu e parë e arsyeshme nga drejtuesit e klubit për rritjen më tej të Partizanit.
Drejtor emërohet Arbër Abilaliaj, deri atë kohë sipas informacioneve tona pjesë e një kompanie menaxhimi lojtarësh.
Këshilltar në radhet e klubit të kuq në këtë periudhë ka qenë dhe vazhdon të jetë edhe Pano Xhixho.
Këta 2 emra së bashku me shefin e scoutingut Altin Ferati kanë qenë përgjegjës për merkaton gjatë këtyre 2 viteve si edhe ura lidhëse ndërmjet ekipit dhe presidentit.
Gjatë këtyre 2 viteve trajnerët e Partizanit kanë qenë Zekiç, Abilaliaj, Shehi, Abilaliaj, Veselinoviç, Abilaliaj dhe së fundmi Skënder Gega.
Lojtarët që kanë veshur bluzën tone kanë qenë të shumtë dhe shumica prej tyre as nuk mbahen mend por thjesht kanë ardhur dhe janë larguar si dështim.
Arbër Abilaliaj e ka përdorur Partizanin në funksion të pozicionit të tij para se te emërohej te Partizani, duke marrë e duke larguar lojtarë veç për përfitime personale sipas marrëveshjeve të fshehta që ai ka bërë me lojtarë e agjentë lojtarësh. Kjo ka sjellë edhe konflikt të tij me disa trajnerëe që gjatë kësaj kohe kanë qenë pjesë e Partizanit.
Këto zëra kanë qenë gjithmonë prezente dhe për disa raste ne kemi pasur edhe konfirmim të drejtpërdrejtë nga vetë personazhet.
Por nuk ka qenë pjesë e asaj që ne jemi të merremi me këto çështje, duke pritur që këshilltari i presidentit të bënte detyrën e tij duke raportuar te punëdhënësi meqënëse ka qenë në dijeni. Heshtja e tij tregon paaftësi ose konflikt interesi.
Ajo që është e qartë është se Partizani është përdorur për përfitime personale, komisione nga disa njerëz që nuk kanë lidhje me Partizanin.
Rezultat i kësaj janë edhe sezonet e dështuar në çdo aspekt.
Partizani gjithmonë e më shumë po largohet nga tradita e tij dhe sigurisht edhe nga tifozeria e tij e zjarrtë.
Partizani nuk mund te trajtohet si klub privat dhe të jetë “pazar” për njerëz të ndryshëm që kërkojnë veç të përfitojnë prej tij me mënyra të ndryshme.
Partizani është simbol i sportit Shqiptar!
Identiteti i tij nuk mund të përbaltet apo të cenohet!!!
