Presidenti i Iranit, Masoud Pezeshkian, deklaroi se vendi i tij është i përgatitur për çdo përshkallëzim të mundshëm ushtarak nga Izraeli, ndërsa theksoi se Teherani nuk do të tërhiqet nga programi i tij bërthamor.
Në një intervistë ekskluzive për “Al Jazeera”, Pezeshkian u shpreh se nuk është optimist për një armëpushim të qëndrueshëm me Izraelin pas përfundimit të konfliktit 12-ditor mes dy vendeve, i cili u ndërpre më 24 qershor me ndërmjetësimin e Shteteve të Bashkuara.
“Ne jemi plotësisht të përgatitur për çdo lëvizje të re ushtarake izraelite. Forcat tona të armatosura janë gati të godasin thellë brenda territorit izraelit”, tha presidenti iranian.
Ai konfirmoi gjithashtu se programi bërthamor i Iranit do të vazhdojë, duke këmbëngulur se qëllimet e tij janë paqësore. Komentet e tij vijnë në një kohë kur vendet perëndimore po kërkojnë një zgjidhje për ambiciet bërthamore të Teheranit, pas sulmeve izraelite ndaj objekteve bërthamore iraniane gjatë konfliktit të fundit, të cilat, sipas raporteve, kishin efekt më të kufizuar se sa ishte deklaruar fillimisht nga Uashingtoni.
Pezeshkian theksoi se sulmet e Izraelit kishin shkaktuar humbje në radhët e Iranit, duke përfshirë figura ushtarake dhe shkencëtarë të programit bërthamor, por shtoi se edhe Izraeli kishte pësuar dëme serioze.
“S’jemi shumë optimistë për armëpushimin. Jemi të përgatitur për çdo skenar dhe çdo përgjigje. Izraeli na ka goditur fort, por ne e kemi goditur edhe më thellë në brendësi të tij”, tha presidenti iranian.
Gjatë konfliktit të fundit, më shumë se 900 persona u vranë në Iran, shumica civilë, ndërsa në Izrael u raportuan të paktën 28 viktima.
