Nga Boldnews.al
Shumëkujt mund t’i kujtohet se, në prag të Vitit të Ri 2024, Autoriteti i Konkurencës shpalli me të madhe se kishte nisur një monitorim të hollësishëm në tregun e ushqimeve, për parandalimin e abuzimeve me çmimet me rastin e festave.
Autoriteti, nën drejtimin e Denar Bibës, “siguroi qytetarët se do të identifikojë dhe ndëshkojë çdo fenomen të mundshëm të ngritjes artificiale të çmimeve që mund të shkaktohet nga praktikat jo të drejta të konkurrencës”.
Gjithashtu, Biba i Konkurencës u shfaq i rreptë në njoftimin publik, të shpërndarë masivisht në media: “Sjellim në vëmendje të rrjeteve të ndërmarrjeve tregtare se, shkelja e ligjit përbën kundërvajtje administrative dhe sanksionohet me gjobë, në masën deri në 10 për qind të xhiros së vitit financiar paraardhës të ndërmarrjeve të përfshira në marrëveshje të paligjshme”.
Efektet e këtij paralajmërimi, i dinë më mirë se kushdo qytetarët shqiptarë, të cilët u përballën edhe atë sezon festiv, njëlloj si në vitet e mëparshme, me rritjen tejet abuzive të çmimeve. Pati nga ato produkte të përditshmërisë, të cilat u rritën brenda pak ditëve me 50% të vlerës së tyre.
Ndërsa frutat dhe perimet u rritën edhe 100 përqind të çmimit të tyre në ditët e fundit të vitit.
Ndërkohë, megjithëse kanë kaluar më shumë se 6 muaj nga ai “paralajmërim” serioz i Denar Bibës, Autoriteti i Konkurencës nuk ka dalë me asnjë raport vëzhgimi apo vlerësimi për situatën e çmimeve për Vitin e Ri.
“Boldnews.al” kreu një verifikim në të dhënat zyrtare të publikuara në faqen e internetit të Autoritetit të Konkurencës. Aty nuk gjendet asnjë lloj informacioni për atë “monitorim të menjëhershëm” dhe të thelluar për çmimet e shportës.
Më së paku, Autoriteti i Konkurencës mund të hartonte një raport, ku të deklaronte se nuk kishte zbuluar abuzime me çmimet. Ky, natyrisht, nuk do të ishte një raport real, por gjithësesi, do të ekzistonte një i tillë.
Por, Autoriteti i Konkurencës duket se e ka harruar atë premtim serioz që i bëri opinionit publik, pasi, kur kanë kaluar mbi 7 muaj, ende nuk është në gjendje të thotë nëse çmimet e produkteve të shportës u rritën apo jo gjatë festave të fund-vitit 2024. Ndoshta, një raport i tillë, mund të përfundojë për Vitin e Ri 2025.
Gjithësesi, kreu i Autoritetit të Konkurencës, Denar Biba, duhet të ketë pasur angazhime të tjera të rëndësishme, të cilat e kanë penguar të ushtrojë detyrën aktuale.
Biba, në fillim të vitit 2025, aplikoi për një vend vakant në Gjykatën Kushtetuese. Ai është një nga 10 kandidatët që iu përgjigjën thirrjes së Gjykatës së Lartë për të garuar si zëvendësues i gjyqtares dhe, njëkohësisht kryetares së Kushtetueses, Holta Zaçaj.
Këshilli i Emërimeve në Drejtësi (KED), struktura që verifikon kandidatët për në Kushtetuese, e drejtuar nga kreu i Gjykatës së Lartë, Sokol Sadushi, nuk ka arritur ende të dalë me një rezultat përfundimtar për verifikimin e pasurisë, integritetit personal dhe aftësive profesionale të Denar Bibës.
Këshilli i Emërimeve në Drejtësi pritet të mblidhet për herën e tretë vetëm për Denar Bibën të hënën e kësaj jave (21 korrik 2025), pasi në dy mbledhje të mëparshme nuk arritën të konkludonin për kandidaturën e tij.
Duket se pika më e dobët e Bibës është pasuria dhe ligjshmëria e saj. Në 10 Korrik 2025, Këshilli i Emërimeve në Drejtësi deklaroi publikisht se: “Vendosi t’i kërkojë Inspektoratit të Lartë të Deklarimit dhe Kontrollit të Pasurive dhe Konfliktit të Interesit sqarime të mëtejshme për të specifikuar në mënyrë të detajuar burimet financiare të ligjshme, që justifikojnë çdo pasuri të kandidatit z. Denar Biba”.
Duket se sqarimet kanë ardhur shpejt dhe KED-i e ka vendosur vijimin e procedurës së verifikimit të kushteve të Denar Bibës në mbledhjen e 21 korrikut.
Shtyrja tre herë rresht e mbledhjeve për një kandidat është një ngjarje e rrallë për Këshillin e Emërimeve në Drejtësi. Por, për Denar Bibën ka një qasje më pozitive, siç duket nga kreu i Këshillit dhe njëkohësisht kryetari i Gjykatës së Lartë, Sokol Sadushi.
Denar Biba është kandidat për pozicionin e pavarur të gjyqtarit kushtetues, megjithëse karriera e tij është ndërtuar tërësisht mbi bazën e afërsisë politike me Partinë Socialiste të Edi Ramës.
Biba edhe më herët ishte kryetar i një institucioni “të pavarur”, siç është Komisioni Qendror i Zgjedhjeve.
Por, ai iu përgjigj me kokë ulur urdhërit të Edi Rama, kur i kërkoi atij dorëheqjen nga KQZ, në vitin 2017, në vijim të një pakti politik ndërmjet kryeministrit dhe kryetarit të opozitës së kohës, Lulzim Basha.
