Presidentja e Kosovës, Vjosa Osmani, ka dërguar në Gjykatën Kushtetuese një kërkesë për vlerësimin e konfliktit të kompetencave kushtetuese lidhur me moskonstituimin e Kuvendit brenda afatit ligjor. Kjo kërkesë synon pezullimin e rrjedhjes së mëtejshme të afatit 30 ditor për konstituimin e Kuvendit, duke argumentuar se situata aktuale rrezikon sovranitetin, formën e qeverisjes dhe ndarjen e pushteteve në Republikën e Kosovës.
Në dokumentin e dorëzuar, Osmani thekson se mungesa e Kuvendit dhe funksionimi i Qeverisë në detyrë me kompetenca të kufizuara, pa mbikëqyrje parlamentare, po shkakton një krizë institucionale që cenon edhe kompetencat kushtetuese të Presidencës.
Në kërkesën e saj, presidentja kërkon nga Gjykata Kushtetuese:
Pranimin dhe miratimin e kërkesës për masë të përkohshme për pezullimin e afatit kushtetues;
Vlerësimin preventiv të konfliktit të kompetencave mes institucioneve kushtetuese në rast se Kuvendi konstituohet pas afatit të parashikuar në Kushtetutë;
Zgjidhjen e konfliktit kushtetues të kompetencave, duke përfshirë edhe pasojat juridike të moskonstituimit ose konstituimit të Kuvendit jashtë afatit;
Sqarimin e efekteve të tjera juridike që lidhen me këtë krizë institucionale.
Presidentja paralajmëron se mungesa e Kuvendit po rrezikon ushtrimin e sovranitetit përmes përfaqësuesve të zgjedhur dhe po dëmton vlerat themelore të Republikës së Kosovës.
