Gjatë 24 orëve të fundit në vend janë raportuar 23 vatra zjarri, nga të cilat 7 mbeten ende aktive dhe 2 të tjera janë në monitorim. Zjarret janë përhapur në disa qarqe, përfshirë Dibër, Mat, Vlorë, Elbasan, Korçë, Lezhë, Fier dhe të tjera.
Vatrat më problematike ndodhen në:
Parkun Kombëtar Lurë, ku flakët janë aktive në dy zona të veçuara;
Mat, në zonën e Zall Gjoçaj, ku terreni i thyer ka vështirësuar ndërhyrjen;
Vlorë, në Qafën e Shëngjergjit mbi fshatin Dukat, ku zjarri ka përfshirë edhe kurorat e pishave;
Elbasan dhe Librazhd, në një pyll gështenje në zonën Shmil-Gurakuq;
Lezhë, afër tunelit të Shkopetit;
Devoll, në Vernik, ku zjarri është përhapur drejt kufirit grek;
Korçë, në fshatin Dishnicë.
Në monitorim janë edhe vatra në Bulqizë dhe Mallakastër.
Sipas të dhënave zyrtare, mbi 269 hektarë sipërfaqe janë përfshirë nga flakët, përfshirë shkurre, bimësi dhe rreth 30 rrënjë ullinj. Pritet nivel i lartë rreziku për zjarre në pjesën më të madhe të vendit, ndërsa reshje nuk parashikohen.
