Edi Rama, gjatë një takimi me deputetët dhe drejtorët e Bashkisë së Tiranës, deklaroi se do të sekuestrojë të gjitha ndërtesat e braktisura pas viteve ’90. Një deklaratë e çuditshme, pasi ato edhe pse mund të jenë të braktisura, janë prona private të dikujt.
Po ashtu, Rama paralajmëroi se do të sekuestrojë dhe kalimin në emër të shtetit edhe për objektet që e kanë shkelur mbi 2% lejen e ndërtimit.
“Nga ana tjetër, do të marrim një tjetër masë për të konfiskuar në interes të publikut të gjitha ndërtimet e braktisura dhe të gjitha ngrehinat e braktisura nëpër Shqipëri që nga vitet ’90, që qëndrojnë si karakatinë dhe që kanë edhe problematika të natyrës mjedisore dhe të shëndetit të njerëzve. Do të sqarojmë përfundimisht edhe aspektin me të cilin kanë luajtur shumë njerëz të sistemit të drejtësisë, që kanë mbajtur anë e kanë shkelur edhe të ligjshme edhe të ndërlikuara, kur vjen puna te shkelja e lejes së ndërtimit me 2% të kufijve të lejes. 2% është krejtësisht e arsyeshme që është edhe në vende të tjera të botës, por kur ky 2% kapërcehet, kjo do të provokojë sekuestrimin e menjëhershëm të të gjithë ndërtimit, jo të një pjese. Paligjshmëria është e plotë sepse shkelje në ndërtim dhe ndërtimi i volumeve shtesë për qëllim fitimi bëhen në vetëdije dhe janë një shkelje në vazhdim e ligjit. Kjo do të sjellë kalimin menjëherë të asaj prone në dyert e shtetit”,– tha Rama.
Rama kritikoi edhe kantieret e ndërtimeve në vend, të cilat tha se janë ngritur në mosrespektim të asnjë kriteri sigurie apo të mbrojtjes së mjedisit.
“Kantiere që nuk kanë lidhje fare me asnjë lloj rregulli, as për të tjerët rreth e rrotull, as për mjedisin, as për hapësirën, as për sigurinë. Kantiere që nuk janë kantiere. Për këtë arsye do të bëhet edhe një ndërhyrje kuptimplote edhe në raport me kantierët e ndërtimit, për të bërë të qartë se çfarë kriteresh duhet të përmbushë një kantier ndërtimi. Ka edhe një “sport tjetër”: ku ata ndërtues apo zhvillues që marrin një leje, po ende pa marrë dokumentin, kuturisen të fillojnë të hapin gropa, me demek që po hapin kantier, e me abuzim përdoret neni 6 a 7 për ndërtime praprakë”,- tha Rama.
Kryeministri njoftoi edhe krijimin e Agjencisë Kombëtare të Planifikimit dhe Zhvillimit të Territorit.
“Do të procedojmë më pas në vijim paralelisht me krijimin e Agjencisë Kombëtare të Planifikimit dhe Zhvillimit si një agjenci me shtrirje në territor dhe me përfaqësi në çdo rajon. Të gjitha bashkitë do ta kenë më të lehtë për sa i përket planifikimit dhe zhvillimit të territorit, gjë që do t’i ndihmojë shumë bashkitë e vogla sidomos”.– tha Rama.
