“Po të ndodhej edhe ai atje, sigurisht që nuk mund të përjashtohet mundësia që të ngrihet çështja e mbajtjes së një takimi.”
Kremlini nuk përjashton mundësinë e një takimi kokë më kokë në Pekin midis Vladimir Putin-it dhe Donald Trump-it, në rast se të dy do të ndodhen në kryeqytetin kinez në fillim të shtatorit. Megjithatë, deklarata është e kujdesshme: theksohet se presidenti rus pritet të jetë në Kinë për përvjetorin e 80-të të përfundimit të Luftës së Dytë Botërore, por theksohet gjithashtu se “nuk kemi dëgjuar që edhe presidenti Trump do të jetë atje.”
Aktualisht nuk ka asnjë konfirmim për ndonjë udhëtim të mundshëm të Trump-it në Kinë në shtator. Megjithatë, gazeta The Times shkruan se “një seri marrëveshjesh tregtare mes Uashingtonit dhe Kinës ka zbutur armiqësinë e presidentit Trump ndaj Pekinit dhe kanë dalë sinjale që ai mund të ftohet për t’u takuar me presidentin Xi dhe presidentin Putin në një samit në shtator.”
Rreth dhjetë ditë më parë, edhe sekretari amerikan i Shtetit, Marco Rubio, përmendi një samit të mundshëm midis Xi Jinping dhe Donald Trump, duke thënë se presidenti amerikan ishte ftuar në Kinë. Por ende nuk është përcaktuar ndonjë datë për këtë takim. Dhe nuk është aspak e sigurt që Trump do të dëshirojë të shkojë në Pekin pikërisht në kohën kur Kina po feston 80-vjetorin e përfundimit të luftës dhe të takohet atje me Xi-në dhe Putinin.
Përvjetori do të mbahet më 3 shtator, një datë shumë pranë asaj të 2 shtatorit, kur përfundojnë “50 ditët” që Trump i ka caktuar si afat për një marrëveshje paqeje midis Rusisë dhe Ukrainës, pasi në të kundërt ka paralajmëruar sanksione dytësore ndaj Moskës dhe partnerëve të saj tregtarë. Konteksti është pra veçanërisht i ndjeshëm nga këndvështrimi gjeopolitik.
Që kur u rikthye në Shtëpinë e Bardhë gjashtë muaj më parë, Trump-i ka afruar Uashingtonin me regjimin e Kremlinit, por së fundmi duket se ka ndryshuar qëndrim ndaj Putin-it (të paktën përkohësisht), duke treguar padurim për vazhdimin e luftës që ai kishte premtuar ta përfundonte “brenda 24 orëve”.
Bisedimet mes Rusisë dhe Ukrainës që u zhvilluan në Stamboll më 16 maj dhe 2 qershor sollën disa shkëmbime të të burgosurve, por nuk ndaluan luftime.
Të shtunën, presidenti ukrainas Volodymyr Zelensky tha se i kishte dërguar një ftesë Kremlinit për bisedime të reja paqeje. Mediat shtetërore ruse raportojnë se negociatat mund të zhvillohen sërish në Stamboll këtë fundjavë.
Megjithatë, agresioni ushtarak i urdhëruar nga Putini ndaj Ukrainës nuk ka ndalur. Dronët dhe raketat vazhdojnë të marrin jetë civilësh. Propozimi amerikan për një armëpushim prej të paktën një muaji vazhdon të injorohet në tavolinën e Putin-it, dhe Moska nuk ka bërë asnjë hap pas nga kërkesat e saj, përfshirë pretendimin që trupat ukrainase të tërhiqen plotësisht nga katër rajone që aktualisht janë të pushtuara vetëm pjesërisht nga forcat ruse.
Mbetet për t’u parë nëse dhe kur Trump do të shkojë në Kinë. Analisti politik Wen-Ti Sung i tha Times se gjasat që presidenti amerikan të udhëtojë në Pekin në fillim të shtatorit janë “të pakta”.
“Po, Trump mund të dojë të ndihet si një njeri i madh me rëndësi historike dhe të ndajë skenën me dy liderë të tjerë të fuqive të mëdha, por ai ndoshta do të preferonte t’i takonte ata në tokën amerikane. Nuk besoj se është i interesuar të jetë thjesht një nga ‘tre miqtë’ në festën e Xi Jinping,” tha politologu. Megjithatë, shumë mendojnë se Trump është një politikan i paparashikueshëm.
Burimi: La Stampa
