Albert Pashaj, pronari i hotelit në Ksamil i cili u dhunua dje me sende të forta nga Agim Taraj (pronar i “Sunset Beach Bar”), Silvjan Sulku dhe Aldo Zeqiraj, në një intervistë për MCN ka treguar detaje të reja rreth konfliktit, ku shkaku duket se ka qenë ndarja e hapësirave për shezllonet.
Pashaj deklaroi se është kërcënuar vazhdimit nga Agim Taraj që prej 15 nëntorit të vitit të kaluar, kur kanë nisur aplikimet për ndarjen e plazheve, ku biznesmeni i “Sunset Beach Bar” i kërkonte që të mos aplikonte. Ai tha se para një muaj është dhunuar dhe se për këtë ngjarja ka bërë edhe kallëzim.
Ai shtoi më tej se kishte aplikuar për vendosjen e shezllonëve, pasi sipas tij, i takonte sipas ligjit, por deklaroi se është bërë “ping pong” mes Bashkisë së Sarandës dhe Agjencisë së Bregdetit dhe se për këtë gjë kishte vënë në dijeni 2-3 herë edhe ministren Mirela Kumbaro.
Pashaj deklaroi se Bashkia e Sarandës e drejtuar nga Oltion Çaçi i refzonte aplikimin, ndërkohë që ja aprovonte Agim Tarajt, i cili nuk ka fare njësi akomoduese.
Pas shumë tentatovash, Pashaj tha se Agjencia e Bregdetit i kishte aprovuar aplikimin për 52 çadra, pasi i kishte të gjitha kushtet, por sësish sipas tij, Bashkia e Sarandës e drejtuar nga Oltion Çaçi nuk i shkoi duke i djegur afatet dhe duke u vënë në shërbim të Agim Tarajt.
Sipas Pashaj, kryebashkiaku Oltion Çaçi i ka thënë se ai të merrte vetëm 20 çadra, ndërsa të tjerat t’i merrte Agim Taraj.
“Jam i goditur në kokë, jam i çarë. Problematika nuk është se ka filluar dje. Jo vetëm dhuna fizike ndaj meje dhe familjes, por ka disa muaj. Që kur janë hapur aplikimet e plazheve në 15 nëntor, jam kërcënuar nga Agim Taraj, indirekt dhe direkt që të tërhiqem dhe të mos aplikoj. I kam thënë jo se mua ma jep ligji, kam investuar disa miliona euro nuk mund të kem hotel, njësi akomoduese kur e jep dhe ligji dhe të mos kemi shezlonge. Këto presione kanë vijuar vazhdimisht. Kam marrë aprovimin nga Agjencia Bregdetare, janë aprovuar 52 çadra për strukturën akomoduese se plotësoj të gjithë kushtet. Kur merr aprovimin, më kanë thënë të paraqitem në bashki, të bëj pagesën e qirasë dhe të vijë bashkia të bëjë matjet për vendosjen e çadrave.
Kam shkuar atje dhe bashkia më ka thënë jo prit sot dhe jo prit nesër. Pastaj më nxori që nuk merr aq çadra sa ke marrë ti dhe subjekti tjetër Agim Taraj, që nuk ka strukturë akomoduese nuk ka fare hotel. I jam drejtuar Agjencisë së Bregdetit dhe i kam thënë që bashkia nuk më aprovon për këtë arsye. Ata më thonë që bashkia ka detyrë të bëjë matjet në terren
Bashkia nuk erdhi kurrë dhe luante ping pong me Agjencinë e Bregdetit. Kam vënë në dijeni Kumbaron 2-3 herë. Më 6 qershor ka ardhur Taraj dhe në sytë e 50-60 turistëve më ka dhunuar , kam bërë kallëzim dhe çështjen e ka prokuroria.
Familja, nusja bashkë me fëmijët ka shkuar për të bërë plazh, në plazhin e ashtuquajtur publik se nga momenti që bashkia nuk erdhi të më miratonte planin dhe unë nuk plotësova dokumentet që t’i dërgoja tek Agjencia Bregdetare dhe pasi merr aprovimin nga Agjencia e Bregdetit duhet të vijë bashkia. Unë nuk e bëra se bashkia nuk erdhi kurrë dhe u dogjën afatet. Agjencia e Bregdetit më dërgon mesazh që t’i nuk plotësove dokumentet dhe ne nuk të kualifikuam. Ky nuk ishte faji im, ishte faji i bashkisë.
Më parë këtë plazh e ka shfrytëzuar Taraj. Tani kam hotelin, ndërsa Taraj ka ndërtesat në krah, disa objekte të vogla. Mua ma jep ligji, nuk kam kërkuar që Taraj të zhvendosej, por që një pjesë ta marr unë se ma jep ligji. Bashkia dhe Agjencia e Bregdetit duhet ta bënin këtë ndarje dhe nuk e kanë bërë kurrë. I kam dërguar disa mesazhe ministres Kumbaro, nuk më ka kthyer përgjigje. Kam takuar dhe kryebashkiakun në zyrë dhe më ka thënë merr 20 çadra dhe lërja atij tjetrit.
Bashkia e Sarandës përveç se nuk më ka nisur asnjë dokument me shkrim që të më thotë për këtë arsye se pse nuk e përfitoj. Gojarisht më tha merr 20 çadra dhe lërja atij. I thashë cila është arsyeja? Më tha lërja atij. Bashkia na ka lënë në baltë. Taksën e paguajmë.” – deklaroi Albert Pashaj.
Pashaj deklaroi se nëse drejtësia nuk bën punën e vet, ai do të vetëmbrohet.
“Nëse drejtësia do të bëjë punën e vet, unë ia lë drejtësisë. Nëse drejtësia nuk do ta bëjë punën e vet, atëherë unë do të vetëmbrohem se s’kam se çfarë bëj tjetër.” – tha Pashaj.
