Teksa ditë pas dite publikohen skandale të produkteve ushqimore me baktere të rrezikshme apo ushqime të skaduara që u falsifikohet etiketa, Rama krenohet me sekuestrimin e produkteve që shiten pa faturë.
Pra, problemi më i madh në ditën e sotme për kryeministrin është fatura, ndërkohë që shqiptarët helmohen dhe po vriten dita ditës nga oligarkë që thjesht procedohen penalisht nga policia edhe pas një skandali si ai i sotmi.
Konkretisht, në fabrikën “Master AL”, pronë e Skifter Taganit në qytetin e Vorës, grumbulloheshin ushqime të skaduara nga tregje të ndryshme të vendit, kryesisht në qytete si Tirana, Elbasani dhe Durrësi por edhe nga jashtë Shqipërisë, dhe falsifikoheshin etiketat të cilat më pas në mënyrë kriminale hidheshin sërish në treg.
Në një postim në Facebook, Rama bën me dije se në gjashtë ditët e para të aksionit për kontrollin e tregut nga ushqimet që shiten pa faturë janë sekuestruar në total 32 ton produkte bulmeti, qumësht dhe mish.
“Vijon papushim sekuestrimi i qumështit, bulmetrave dhe mishit pa faturë”, shkruan kryeministri Edi Rama, krahas një videoje ku duken produktet e sekuestruara ditët e fundit.
