Një ngjarje e rëndë ka ndodhur herët në mëngjesin e së shtunës në East Hollywood, ku një automjet u përplas me një grup njerëzish pranë West Santa Monica Boulevard, rreth orës 02:00, sipas njoftimit të Departamentit të Zjarrfikësve të Los Angeles (LAFD).
Si pasojë, 28 persona kanë mbetur të plagosur. Tre ndodhen në gjendje kritike, gjashtë janë në gjendje të rëndë, ndërsa 19 të tjerë kanë pësuar lëndime më të lehta.
Pamjet filmike nga vendngjarja tregojnë trupat e të plagosurve të shtrirë në rrugë dhe trotuar, ndërsa ekipet mjekësore po jepnin ndihmën e parë. Disa persona janë transportuar me urgjencë në spital.
Policia ka rrethuar zonën dhe ka nisur hetimet për të zbardhur rrethanat e incidentit. Ende nuk është bërë e ditur nëse drejtuesi i mjetit është arrestuar apo është larguar nga vendi i ngjarjes.
