Një denoncim nga një punonjës i doganave shqiptare ka hedhur dritë mbi atë që e quan “kontrabanda më e frikshme në historinë e vendit” e drejtuar nga “koka”, drejtori i doganave shqiptare Gent Gazheli.
Punonjësi shprehet se doganat shqiptare janë gjunjëzuar më keq se në vitin famëkeq 1997, nën drejtimin e Gent Gazhelit.
“Të gjithë punonjësit që nuk i binden urdhrave për të ngritur dhe ulur traun, degdisen”- shprehet denoncuesi.
“Asnjë ‘gjemb në këmbë’ Gazhelit, teksa në Qafë Botë arrestohen doganierë të palës greke për kamionët që kalojnë me mallra të kontrabanduara drejt Shqipërisë”, shton ai.
Rreth një javë më parë 13 doganierë grekë u arrestuan nga autoritetet në Qafë Botë për kontrabandë me territorin shqiptar duke pezulluar kalimin në pikën doganore.
Doganierët akuzoheshin për mitmarrje, abuzim me detyrën dhe përfshirje në një skemë të sofistikuar kontrabande, ku në këmbim të ryshfetit shmangeshin kontrollet ndaj kamionëve dhe rimorkiove me mallra që kalonin kufirin.
Në pesë vite në krye të Doganave të Shqipërisë, Gent Gazheli ka qëndruar si një figurë e paprekur, pavarësisht skandaleve të njëpasnjëshme që kanë tronditur pikat doganore në vend. Arrestime për kontrabandë, shpërdorim detyre dhe korrupsion janë bërë rutinë për vartësit e tij, por për Gazhelin nuk është hapur asnjë hetim administrativ, nuk ka asnjë transparencë për zinxhirin e përgjegjësisë, as masa ndëshkuese për strukturën që ai drejton.
Përkundrazi, duket se në vend të pasojave, kemi të bëjmë me një kulturë të promovimit të abuzimit. Në çdo shtet normal, kur punonjësit e një institucioni kapen duke shkelur ligjin, drejtuesit të paktën mbajnë përgjegjësi politike, nëse jo penale. Por jo në Shqipëri. Këtu drejtues si Gazheli duket se janë të vaksinuar ndaj çdo lloj përgjegjësie, edhe kur përmes duarve të strukturës që ata drejtojnë kalojnë miliona euro kontrabandë.
Kush e mbron Gent Gazhelin?
A është ai realisht i painformuar për atë që ndodh nën hundën e tij, apo është thjesht i pazëvendësueshëm për interesa të mëdha që lidhen me qarkullimin e parasë në pikat kufitare?
Nëse kemi ndërtuar një sistem të mirëfilltë kontrabande që funksionon pavarësisht arrestimeve, atëherë pyetja nuk është më “kush po na vjedh?”, por “kush po i mbron hajdutët?”/JOQ
