Nga Boldnews.al
Kombinati, një prej lagjeve më të mëdha në Tiranë, prej vitesh është në një lëngim të vertetë. Varfërisë ekstreme të kësaj zone, vetëm pesë kilometra larg qendrës së kryeqytetit, iu shtuan edhe pasojat e rënda të tërmetit tragjik të 26 nëntorit 2019.
Dhjetra pallate e shtëpi më të ulta u dëmtuan keqaz nga lëkundjet sizmike dhe një pjesë e tyre u përfshinë në planin e demolimit të detyruar nga Bashkia dhe Inspektorati Ndërtimor.
Tashmë, gati 6 vjet pas asaj ngjarjeje të rëndë, Kombinati është një rrënojë e madhe. Kryeministri Edi Rama dhe kryetari (tashmë i arrestuar) i Bashkisë, Erion Veliaj, premtuan që në ditët e para pas tërmetit se lagja do të rindërtohej e re, me kushte perëndimore, brenda një kohë shumë të shkurtër.
Por, fjalët i mori era. Veliaj tani po “shijon” qelitë e paraburgimit në Durrës, ndërsa Rama ka halle shumë më të mëdha, me natyrë gjeopolitike, se sa shqetësimet e përditshmërisë së kombinatasve.
Megjithatë, për të kujtuar banorët e kësaj zone se ata janë në zemër të Ramës, kryeministri ka dërguar për ekspeditë ekzotike në këtë zonë deputeten e sapozgjedhur, Iris Luarasi.
Pedagogia e gazetarisë, “zysh Irisi”, e cila mori një mandat qyl nga kryerilindësi, pasi ishte në “listën e mbyllur të kandidatëve” të Partisë Socialiste për Tiranën dhe që nuk e lodhi aspak veten për t’u dukur se po bënte fushatë, tashmë ka dalë shëtitje në Kombinat, për “të qarë hallet e banorëve”.
“Bashkë me drejtuesen e Njësisë Administrative nr. 6, patëm kënaqësinë të jemi pranë banorëve të bllokut 4 në Kombinat, për të dëgjuar, për të kuptuar, dhe mbi të gjitha, për të vepruar! Zëri i qytetarëve është busulla jonë, dhe energjia pozitive që na transmetuan, na motivon edhe më shumë për të çuar përpara zgjidhje konkrete që përmirësojnë jetën e përditshme”, shkruan një tekst plot pathos zysh Irisi në rrjetet sociale.
Postimi i “zysh Irisit” është shoqëruar edhe me disa foto, ku bien në sy pamje nga një “treg Gabi” pranë ish-qytetit të nxënësve, si edhe të mbeturinave të pambledhura në zonë.
“Zysha”, një mbrojtëse e flaktë e të drejtave të njeriut, ka harruar “një detaj të vogël” në këto foto. Tek shkrepjet e publikuara në profilin e saj në “Facebook”, ajo ka nxjerrë me fytyrë dy të mitur, në mesin e grumbullit të plehrave.
Por, kjo “shkelje flagrante” nuk përbën problem për aktivisten, e shndërruar në rilindase.
Gjithësesi, mesazhi që synon të përcjellë “zysh Irisi” me fotot me mbeturina që, tashmë që ajo u bë deputete, nën drejtimin edhe të liderit vizionar, Edi Rama, lagja e Kombinatit do të shpëtojë nga varfëria dhe nga plehrat.
Kjo “historia e plehrave” mund të jetë edhe një mesazh që “Rilindja e Re” e Rama-Luarasit do të rregullojë ato “të pabërat” e Erion Veliajt, i cili, si kryebashkiak i Tiranës për gati 10 vjet, nuk e zgjidhi punën e mbeturinave.
Zysha, “ftujake” në politikën e lartë, e cila do të futet në Parlament falë aftësisë së saj për t’iu “lëpirë” pushtetit të Edi Ramës nga njëra studio në tjetrën, nuk ka aspak guxim të tregojë se përse është kjo gjendje në Kombinat (por jo vetëm).
“Zysh Irisi” duhet të lexojë më shumë, për të kuptuar se Kombinati, por edhe i gjithë vendi, drejtohet prej 12 vitesh nga lideri i saj, Rama. “Zysh Irisi”, gjithashtu duhet të lexojë e të mësojë se, Tirana, pra edhe Kombinati, drejtohet prej vitit 2015 nga rilindasi Erion Veliaj, i cili shihej si “pasardhësi” e kryetarit, derisa përfundoi pas hekurave, në shkurt të këtij viti.
Pas 12 viteve “Rilindjeje”, Kombinati, jo vetëm që nuk mori asnjë lloj përmirësimi, por, për më tepër, u shndërrua në një gërmadhë gjigante.
Tani që do të jetë në Parlament zysh Iris Luarasi, kombinatasve do t’u shtohen shpresat për Rimëkëmbje. Kjo është fjala e zyshës, e cila “xhiron” e parë në Kombinat, e zhvilloi në “Tregun e Gabit”.
Natyrisht, ajo nuk ka shkuar për të bërë pazar aty, pasi standardi nuk ia lejon. Këtë e ka pohuar me gojën e saj, kur deklaroi disa muaj më parë se “nuk kandidon për Drejtor të TVSH-së, sepse rroga (mbi 2 milionë lekë në muaj), nuk më mjafton për shpenzimet e mia”.
