Vetëm një ditë pasi policia dhe prokuroria e Dibrës, njoftuan arrestimin e dy personave, Petrit Çakrri alias Hoxha dhe Fatjon Bushgjokaj, të cilët dyshohen për rrëmbimin dhe mbytjen me litar të Renis Dobra, detaje të tjera kanë dalë për këtë çështje penale.
“Ora News” ka mësuar se gjatë momentit të kontrollit të banesës së Petrit Çakrrit në Lekbibaj të Tropojës, policia i ka gjetur dhe sekuestruar 5 doza kokainë.
Çakrri, ka pretenduar se lënda narkotike i përket atij, pasi është përdorues droge, por për këtë rast policia ka referuar material hetimor në prokurori duke kërkuar ndjekjen penale edhe për “Prodhim dhe shitje të lëndëve narkotike”.
Ndërkohë gjatë marrjes në pyetje, Petrit Çakrri ka pranuar se ka qenë fizikisht në Burrel i shoqëruar me 3 vëllezërit Bushgjokaj, ku pasi kanë pirë kafe së bashku në një kafene ata janë larguar.
Çakrri, ka pranuar se ai është personi që ka marrë makinat me qera, një “Range-Rover” të zi dhe një “Honday Santa” të bardhë, mjete këto që ja ka dorëzuar vëllezërve Bushgjokaj dhe nuk janë përdorur prej tij, në asnjë moment.
Sipas dëshmisë që ai ka dhënë në prokurori prezenca e tij në Burrel ishte për të shoqëruar vëllezërit Bushgjokaj, me të cilët ka pirë kafe dhe është larguar më pas në drejtim të Kosovës dhe më pas në banesën e tij në Lekbibaj të Tropojës.
Çakrri ka mohuar në mënyrë kategorike përfshirjen e tij në vrasjen e Renis Dobrës, të cilin sipas tij nuk e njihte, por emrin për herë të parë ja kishte dëgjuar në televizor.
Vetë Çakri, ka mohuar të bashkëpunojë me prokurorinë, duke thënë se nuk dinte asgjë se çfarë kishin bërë vëllezërit Bushgjokaj me 23-vjeçarin.
Ndërkohë për këtë ngjarje të rëndë është marrë në pyetje dhe i arrestuari tjetër, Fatjon Bushgjokaj, i cili një ditë më pas u arrestua në Tiranë. Boshgjokaj ka mohuar të ketë pasur njohje me viktimën Renis Dobra.
Sipas tij në Burrel kishte qëndruar së bashku me vëllezërit dhe Petrit Çakrrin, ku së bashku kishin takuar një shokun e tyre që qëndron në këtë zonë.
Pasi kanë pirë kafe janë larguar. Bushgjokaj, ka treguar intenerarin e lëvizjes, i cili rezulton i njëjtë me atë që ka arritur të dokumentojë prokuroria deri në këtë fazë të hetimi.
Bushgjokaj, nuk ka pranuar të jetë autor i vrasjes së Renis Dobras. Ndërsa dy vëllezërit e tij, Aleksandës dhe Kristi Bushgjokaj, janë shpallur në kërkim për këtë ngjarje të rëndë.
Pritet që dy të arrestuarit e deritanishëm Petrit Çakrri dhe Fatjon Bushgjokaj, të dalin ditën e shtunë para gjykatës së Dibrës, për tu njohur me masën e sigurisë “arrest me burg”, që do kërkojë përfaqësuesi i prokurorisë./Ora News
