Qeveria ka vendosur të bëjë disa ndryshime në lidhjen e kontratave për blerjen e pajisjeve ose mjeteve ushtarake, si dhe për blerjen e armëve, municioneve apo materialeve luftarake për qëllime operacionale.
Në kuadër të ringritjes së industrisë ushtarake, gjatë vitit të kaluar u vendos krijimi i kompanisë shtetërore KAYO për prodhimin dhe tregtimin e armëve, të municioneve, pajisjeve dhe teknologjive ushtarake.
Si rrjedhojë, në vendimin e saj më të fundit, qeveria ka përcaktuar blerjen e pajisjeve ushtarake nga KAYO. Konkretisht, në vendim shprehen rastet e mundshme të autorizimit të shoqërive aksionare me kapital shtetëror për furnizimin e Forcave të Armatosura me armë, municione, pajisje dhe teknologji ushtarake.
Në rastet kur shoqëria me kapital shtetëror ka të paktën 50% të kapaciteteve të vlerësuara si të nevojshme për realizimin e objektit të kontratës, Ministria e Mbrojtjes mund të blejë drejtpërdrejt nga ajo shoqëri. Pra, lehtësohet procesi i blerjes së pajisjeve nga kompani shtetërore, duke shmangur procedura të tjera tenderimi, por duke plotësuar disa kushte.
Mënyra e pagesës, përfshirë parapagimin apo vënia e fondeve në dispozicion të furnizuesit nga ana e Ministrisë së Mbrojtjes, do të negociohen. Nëse nuk ka një autorizim të drejtpërdrejtë, Ministria e Mbrojtjes kryen dialog negociues me shoqërinë aksionare shtetërore për të gjitha llojet e veprimtarisë që kjo shoqëri mund të realizojë.
Nga procedura e përzgjedhjes së fituesve të kontratave për prokurime, do të shkualifikohet çdo operator ekonomik apo bashkim operatorësh që ka qenë i dënuar me vendim penal të formës së prerë për disa vepra, që ka falimentuar, është në likuidim e të tjera.
Në vendim detajohet edhe blerja e pajisjeve ushtarake nga shtete të tjera. Procedurat “shtet me shtet” mund të realizohen drejtpërdrejt ose nëpërmjet dhënies së autorizimit me një vend partner të NATO-s ose një agjencie të tyre bazuar në një marrëveshje qeveritare.
Për herë të parë theksohet se blerja e pajisjeve ushtarake mund të realizohet edhe me vende partnere të Shqipërisë ose një agjencie të tyre, pra jo vetëm të NATO-s, por vetëm pas miratimit paraprak të Komitetit të Mbrojtjes dhe Sigurisë ose bazuar në një marrëveshje qeveritare./SCAN
