Deputeti i PS-së, Vullnet Sinaj ka dalë kundër porosisë së Edi Ramës, teksa përmes një shkrese zyrtare i ka kërkuar Komisionit Qëndror të Zgjedhjeve pamjet filmike të numërimit të votave për Bashkinë e Vlorës dhe Himarës në zgjedhjet parlamentare të 11 Majit.
Sinaj thekson se ka interes të verifikojë me transparencë çdo detaj të numërimit. Ai sqaron se pamjet do të përdoren vetëm për qëllime verifikimi dhe premton se çdo informacion i marrë do të trajtohet sipas ligjit.
Me këtë lëvizje, Sinaj tregon hapur një qëndrim ndryshe nga linja zyrtare e socialistëve dhe vetë Edi Rama, i cili u ndaloi kandidatëve të tij të kërkonin pamjet filmike të numërimit të votave.
Në zgjedhjet parlamentare të 11 Majit, Vullnet Sinaj ishte kandidati i dytë më i votuar i PS-së në Qarkun e Vlorës me 10 941 vota preferenciale, teksa sipër tij qëndronte vetëm Damian Gjiknuri me 12 408 vota.
Gjatë fushatës u fol për një përplasje të Damian Gjiknurit me Vullnet Sinajn në Vlorë për votat preferenciale. Siç duket, Sinaj tashmë dyshon se Gjiknuri mund t’i ketë vjedhur vota dhe në numërim.
