Një i ri me origjinë shqiptare ka humbur jetën tragjik në një aksident automobilistik të regjistruar këtë të martë në zonën e San Giovanni në Treviso të Italisë. Viktima është 23-vjeçari Kevin Anghele, i lindur në Motta di Livenza, por banues në Pordenone.
Mediat përtej Adriatikut raportojnë se shqiptari po drejtonje një automjet “Alfa Romeo” në momentin kur vuri re një makinë patrullimi të karabinierëve.
Mediat raportojnë se ai ishte një emër i njohur për Policinë, por karabinierët nuk po e ndiqnin, ata thjesht kishin njoftuar me radio qendrën e operacioneve për të kërkuar të riun.
Gjithsesi, për t’iu shmangur policisë italiane, i riu i ka dhënë me shpejtësi makinës, duke humbur kontrollin mbi të, doli nga rruga dhe u përplas me dy pemë.
Aksidenti ndodhi rreth orës 7:50 të mëngjesit, teksa makina u shkatërrua plotësisht nga goditja. I riu ndërroi jetë teksa po transportohej me urgjencë për në spitalin në Oderzo, duke mos u mbijetuar dot plagëve të marra.
Policia gjeti në automjet disa pako kanabisi, të cilat dyshohet se do të shiteshin nga 23-vjeçari me origjinë shqiptare. Kjo dyshohet se ka qenë dhe arsyeja pse ai tentoi t’i shmangej Policisë.
23-vjeçari kishte punuar në sektorin e përpunimit të metaleve për disa vite, duke zhvilluar komponentë për përdorim industrial. I specializuar në prerjen me lazer të fletëve metalike, Kevin gjithashtu merrej me programimin CNC për makinat, duke menaxhuar krijimin e programeve CAD/CAM për të maksimizuar potencialin e makinerisë.
Nëna e 23-vjeçarit jeton në Oderzo, ndërsa i riu kishte vendosur prej kohësh të transferohej në Pordenone.
