Duke folur në takimin me deputetët e Tiranës dhe drejtorët e bashkisë, kryeministri Edi Rama njoftoi se këtë të hënë ka nisur procesi i bllokimit dhe konfiskimit të qumështit dhe produkteve të bulmetit që tregtohen nga fshatarët pa faturë.
“Nga sot, dhe po shikoja informacionet para se të vija këtu, ka filluar procesi i kontrolleve dhe konfiskimit të qumështit dhe bulmetit pa faturë, domethënë pa siguri ushqimore. Aq më tepër në këto temperatura të larta, ku mund të rrezikojnë konsumatorët. Qumësht dhe bulmet pa faturë nuk do të lejohet dhe kushdo që do ta bëjë, do ta humbasë atë mall,” – deklaroi Rama.
Kryeministri “mburret” me aksionin e “taksidarëve” tatimorë të cilët kanë dalë në terren për të ushtruar terror ndaj bizneseve që shesin bulmet pa faturë. Kjo nuk është hera e parë që tatimorët e Ramës dalin për të kontrolluar bizneset por përfundojnë duke mbyllur sytë përballë ryshfetit.
Ka dhe një realitet që nuk mund të mos merret në konsideratë. Në Tiranë, ku nuk ka fabrikë përpunimi qumështi si në Lushnje apo Berat e Gjirokastër, ky produkt rrezikon të mbetet i pashitur nga blegtorët e vegjël. Zgjidhja për ta në këtë rast do të ishte tërheqja e tyre nga mbarështrimi i bagëtive, duke thelluar një krizë që ka nisur prej disa vitesh. Shqipëria numëron më pak se 1.7 milionë krerë lopë e të imta, nga 2.4 milionë krerë para një dekade.
