Nga Boldnews.al
Kisha Ortodokse Autoqefale e Shqipërisë, së shpejti do të ndërtojë një godinë 10-katëshe, në funksion të aktivitetit të saj.
Leja e ndërtimit është dhënë rreth dy muaj më parë nga Këshilli i Rregullimit të Territorit (KKT), nën drejtimin e kryeministrit Edi Rama, ndërkohë që vendimi është zbardhur vetëm së fundmi.
Leja për kishën ortodokse pason një projekt të shpallur më herët nga kryeministri Rama për shpalljen e “shtetit bektashi” dhe duket si një manovër e kreut të qeverisë për të krijuar një aeroelë dashamirësie ndaj komuniteteve fetare, në një vend që e qeveris me nota të forta autokracie.
Megjithatë, leja për godinën e re të Kishës Ortodokse ka një qëllim shumë më të ndryshëm nga moria e kullave që kanë pushtuar Tiranën. Dokumentat e lejes tregojnë se godina e re do të jetë në shërbim të aktivitetit meshar, kishtar dhe didaktik.
Në 18 Prill 2025, KKT miratoi vendimin nr.11, me objekt “Miratimin e lejes së ndërtimit për objektin: “Ndërtesë polifunksionale në shërbim të Kishës Autoqefale Orthodhokse e Shqipërisë 2, 5 dhe 10 kate mbi tokë me 1 kat nëntokë”, me vendndodhje në Bashkinë Tiranë”.
Kisha 10 kate
Ndërtesa e re polifunksionale e Kishës Ortodokse të Shqipërisë pritet të ndërtohet në rrugën e Kavajës, në Tiranë, aty ku sot gjendet Kisha e Ungjillizimit, vendi kryesor i kultit për shumë vite në kryeqytet, që pas rënies së komunizimit.
Trualli i ndërtesës është pjesë e ansamblit Orthodhoks pranë Rr. Kavajës me nje siperfaqe prej 1201 m2. Ndërtesa e re do te fqinjësohet në veri me ndërtesën e Kishës Orthodhokse “Ungjillizimi”, në perëndim me një ndërtesë banimi 10 kate, ndërsa në lindje dhe jug me ndërtesat e ulëta të banimit të zonës përkatëse, subjekte zhvillimi në një të ardhme. Aksesi ekzistues bëhet nëpërmjet Rr. Kavajës.
Referuar dokumentit të lejës së ndërtimit, “trualli ndodhet në afersi të Rrugës së Kavajës dhe më tej, Kishës Orthodhokse Ungjillizimi, shkollës të ciklit të ulët të Kishës dhe ambienteve të saj sportive, gjithashtu dhe objekteve të banimit në afërsi. Për momentin sheshi përballë Kishës shërben si parkim për makina. Gjithashtu vihet re prania e gjelbërimit, siç janë pemët e qiparisave që janë nje pike e rëendësishme e projektit tonë. Duke patur parasysh praninë e shkollës së ciklit të ulët, ambientit sportiv dhe konceptit të ndërteses së re, trualli në fjalë ka të gjitha potencialet per t’u zhvilluar si një ansambël, një vlerë qe i shtohet Kishës, por edhe zonës”.
Në vijim, dokumenti i nënshkruar nga Rama, jep detaje për godinën e re të pritshme.
Objekti zhvillohet në në një pronë prej 1201 m², dhe zë një siperfaqe prej 411 m² në shesh. Objekti përbëhet nga 10 kate mbi tokë të shkallëzuara në 2, 5 dhe 10 me funksion polifunksional akademiko-administrativ kurse kati nëntoke ka funksion laboratoresh dhe biblioteke.
Ndërtesa ka një sipërfaqje ndërtimore mbi tokë 4075.2 m² dhe nëntoke 1040 m². Ndërtesa e re polifunksionale kërkon të plotësojë nevojat administrative dhe edukativo-arsimore brenda ansamblit orthodhoks në rrugën e Kavajës.
Sipas lejes së nënshkruar nga Rama, “kjo ndërtesë nuk mund funksionoje në mënyrë të pavarur nga ndërtesat dhe funksionet ekzistuese në këtë ansambël. Ajo do të plotësojë në mënyrë komplementare nevojat për zyra të reja administrative, do t’i bashkëlidhi programit edukativo-arsimor të ciklit të ulët edhe hapësirat e nevojshme për një cikël të mesëm në vazhdimësi”.
Në vijim thuhet se “ndërtesa do të japë dhe marrë, duke shfrytëzuar hapësirat e ndërsjellta me shkollën e ciklit të ulët. Auditoriumi, laboratorët, biblioteka, zyrat, hollet dhe dhoma muzeale do të funksionojnë si elemente të të njëjtit trup.
Sigurisht që këto dy ndërtesa do të shërbehen edhe nga palestra e mbyllur e cila është planifikuar të zhvillohet në vijim në hapësiren ekzistuese sportive”, thuhet ndër të tjera në dokumentin e lejes së ndërtimit.
