Kompanitë më të mëdha të industrisë së kriptomonedhave në SHBA po garojnë për të siguruar pozicion në sektorin tradicional bankar, duke shfrytëzuar qasjen më miqësore të administratës Trump ndaj aseteve dixhitale dhe duke u përpjekur të bëhen pjesë integrale e sistemit financiar, raporton Financial Times.
Grupet si Ripple, Circle, dhe BitGo kanë aplikuar për licenca kombëtare si “trust bank” nga Zyra e Kontrolluesit të Valutës (OCC), çka do t’u lejojë atyre të ofrojnë shërbime të kufizuara bankare si ruajtje asetesh dhe përpunim pagesash. Ndërkohë, bursa e kriptove Kraken ka bërë të ditur se deri në fund të muajit planifikon të hedhë në treg karta debiti dhe krediti për klientët amerikanë.
“Është një konvergjencë natyrale,” tha për Financial Times Arjun Sethi, CEO i Kraken.
Ky hap tregon se kompanitë e kriptove po zgjerojnë aktivitetin përtej tregtimit të aseteve dixhitale, të inkurajuara nga qëndrimi pozitiv i administratës Trump, ndryshe nga administrata e mëparshme e Biden që u perceptua si armiqësore ndaj sektorit.
Rëndësia e licencave kombëtare
Circle tha se marrja e një licence kombëtare trust bank nga OCC do të ishte “një hap domethënës” për integrimin e aseteve dixhitale në sistemin financiar. Aktualisht vetëm Anchorage Digital mban një licencë të tillë në SHBA. Licencat kombëtare gjithashtu i lirojnë kompanitë nga detyrimi për t’u licencuar në çdo shtet veç e veç.
Sipas juristëve të intervistuar nga Financial Times, edhe ligji i ri i propozuar në Kongres, i njohur si Genius Act, do të lidhë më fort stablecoin-et me sistemin financiar duke kërkuar që ato të mbështeten tek Thesari Amerikan dhe të lëshohen vetëm nga banka të rregulluara ose institucione të licencuara nga OCC.
Stablecoin-et që ndjekin vlerën e monedhave kombëtare si dollari, janë bërë tashmë një mjet i zakonshëm për tregtarët dhe për pagesa ndërkufitare, me mbështetjen entuziaste të Trump dhe kabinetit të tij.
Lëvizje të tjera në treg
CEO i Ripple, Brad Garlinghouse, tha se kompania ka aplikuar gjithashtu për një llogari master në Rezervën Federale për të ruajtur rezervat e stablecoin-it drejtpërdrejt në bankën qendrore.
Në të njëjtën kohë, fintech-e si Robinhood, Revolut dhe Klarna po ndjekin plane afatgjata për të zgjeruar shërbimet financiare në SHBA, duke përfshirë bankingun dhe integrimin e kriptove. Edhe bankat tradicionale si Bank of America po shqyrtojnë lëshimin e stablecoin-eve të tyre sapo të qartësohet kuadri rregullator.
“Kjo administratë ka treguar se është e hapur ndaj aplikimeve për licenca në një mënyrë që administrata e mëparshme nuk ishte,” tha për Financial Times David Portilla nga Davis Polk.
Megjithatë jo të gjitha kompanitë e kriptove e shohin të nevojshme të bëhen banka me licencë të plotë. Kraken, për shembull, do të lançojë aplikacionin e vet të ri pa aplikuar për një licencë ose “master trust”, duke zgjedhur të bashkëpunojë me banka të tjera për shërbime si hipotekat.
“Nuk duam të jemi banka që jep kredi hipotekare. Duam të jemi partneri i duhur për ata që i ofrojnë këto shërbime,” theksoi Sethi.
