Presidenti amerikan, Donald Trump, ka deklaruar se Shtetet e Bashkuara po dërgojnë armë në Ukrainë përmes NATO-s, dhe se kjo aleancë do të mbulojë të gjitha kostot. Komentet i bëri në një intervistë për NBC, vetëm pak ditë pasi Pentagoni kishte paralajmëruar ndalimin e disa dërgesave për shkak të uljes së rezervave ushtarake amerikane.
“Armët po shkojnë në NATO dhe NATO-ja po i dërgon në Ukrainë, duke paguar 100% të kostos”, tha Trump.
Ai njoftoi gjithashtu se më 14 korrik do të bëjë një “deklaratë të madhe” për Rusinë, pa dhënë detaje të mëtejshme. Sakaq, Trump u shpreh i zemëruar me presidentin rus, Vladimir Putin, dhe bëri të ditur se po shqyrton sanksione të reja ndaj Moskës, duke marrë parasysh edhe propozimet e senatorëve Lindsey Graham dhe Richard Blumenthal për ndëshkimin e shteteve që mbështesin luftën e Rusisë.
Ndërkohë, presidenti ukrainas Volodymyr Zelensky i ka bërë thirrje aleatëve që të përdorin asetet ruse për rindërtimin e vendit dhe ka kërkuar më shumë armë dhe investime. Po më 10 korrik, Sekretari amerikan i Shtetit, Marco Rubio, është takuar me homologun e tij rus, Sergei Lavrov, në margjinat e një samiti në Malajzi.
Pas takimit, Rubio deklaroi se i ka kërkuar Rusisë më shumë fleksibilitet dhe theksoi se Shtetet e Bashkuara nuk kanë ndalur ndihmën për Ukrainën. Ai tha se ukrainasit kanë nevojë për sisteme Patriot dhe se shumë prej tyre ndodhen në vende të tjera europiane, por nuk po jepen.
Rubio shtoi se Rusia ka humbur mbi 100 mijë ushtarë vetëm që nga janari 2025, ndërsa humbjet ukrainase janë më të ulëta, por sërish të konsiderueshme.
Lufta në Ukrainë vijon që prej 24 shkurtit 2022, ndërsa perëndimi ka vendosur sanksione të shumta ndaj Rusisë si përgjigje ndaj agresionit. Mijëra persona kanë humbur jetën dhe miliona të tjerë janë zhvendosur nga shtëpitë e tyre.
