Korporatat e mëdha shtetërore kineze të naftës, PetroChina, Sinopec, CNOOC dhe Zhenhua Oil, kanë vendosur të pezullojnë blerjet e naftës ruse të transportuar me rrugë detare, pas vendosjes së sanksioneve të reja nga Shtetet e Bashkuara ndaj kompanive Rosneft dhe Lukoil, dy prodhuesit më të mëdhenj të naftës në Rusi, raporton Reuters.
Ky zhvillim ndodh në një periudhë kur rafineritë indiane, blerësit më të mëdhenj të naftës ruse që transportohet me rrugë detare, planifikojnë gjithashtu të reduktojnë ndjeshëm importet e tyre nga Moska, në përpjekje për t’u përputhur me sanksionet amerikane që lidhen me pushtimin rus të Ukrainës dhe me mungesën e përparimit drejt përfundimit të luftimeve.
Rënia e menjëhershme e kërkesës për naftë nga dy klientët më të mëdhenj të Rusisë pritet të ushtrojë presion mbi të ardhurat e Moskës, duke detyruar importuesit kryesorë në mbarë botën të kërkojnë burime alternative furnizimi, një faktor që ka gjasa të rrisë çmimet globale të naftës.
Aktualisht, Kina importon rreth 1,4 milionë fuçi naftë ruse në ditë përmes rrugëve detare.
Sipas kompanisë analitike Vortexa Analytics, blerjet e naftës ruse nga kompanitë shtetërore kineze kanë rënë në më pak se 250.000 fuçi në ditë gjatë nëntë muajve të parë të vitit 2025. Ndërkohë, firma konsulente Energy Aspects i vlerëson këto blerje në rreth 500.000 fuçi në ditë.
Burime tregtare bëjnë të ditur se Unipec, krahu tregtar i Sinopec, ndaloi blerjet e naftës ruse javën e kaluar.
Sipas të njëjtave burime, Rosneft dhe Lukoil tashmë shesin pjesën më të madhe të naftës së tyre për në Kinë përmes ndërmjetësve, në vend që të kryejnë marrëveshje direkte me blerësit.
