Qeveria ka miratuar një vendim të ri që përcakton kompaninë që do të merret me procesin e gjurmëve të bimës së kanabisit në territorin shqiptar.
Për këtë “detyrë të posaçme” është përzgjedhur kompania “ALBTrace Co” sh.a., një shoqëri me kapital shqiptar dhe arab, e themeluar në muajin mars të këtij viti.
Por kjo kompani ka nën organikë administrator dhe anëtarë njerëzit e besuar të kryeministrit Edi Rama që ndër vite kanë mbajtur poste drejtuese në institucionet e administratës.
Kompania “ALBTrace Co” sh.a. ndodhet nën administrimin e Jona Suli e cila do të ketë përgjegjësinë për prodhimin dhe shpërndarjen e pullave fiskale që do të përdoren për produktet që i nënshtrohen akcizës.
Jona Suli nuk është emër i panjohur pasi është një prej besnikëve të Edi Ramës i cili i ka dhuruar shpesh herë poste me peshë të madhe financiare.
Suli u emërua në muajin dhjetor të vitit 2023, në krye të Agjencinë Shtetërore të Programimit Strategjik dhe Koordinimit të Ndihmës (SASPAC), duke zëvendësuar Ilir Beqajn i cili dha dorëheqje në nëntor të vitit të kaluar pasi iu komunikua akuza e SPAK për koncesionin e sterilizimit.
Më parë Jona Suli mbante postin e Sekretares së Ministrisë së Turizmit dhe në atë kohë ajo u përfol se ishte dërguar në krye të kësaj agjencie si “vegla” e Mirela Kumbaros dhe Ilir Beqajt, në mënyrë që këta të dy të kishin aksesin që kërkonin në milionat e Bashkimit Europian.
Vlen të theksohet fakti se nga zbërthimi i telefonit të Ilir Beqajt, u zbuluan bisedat që ai kishte pasur me Mirela Kumbaron, ku kishin biseduar për caktimin e Sulit në krye të SASPAC, si dhe për takime për të drektuar apo pushime.
Tashmë Ilir Beqaj ndodhet i arrestuar me urdhër nga SPAK për abuzim me fondet e bashkimit europian.
- Kush është Alma Feskaj?
Mes anëtarëve në këtë kompani është Alma Feskaj e cila ka qenë komisionere e Vetingut që tashmë kryeministri Edi Rama është përkujdesur që t’i gjejë punë në kompaninë e kanabisit.
Te kjo kompania shtetërore që do merret me kanabisin qeveria është kujdesur që t’u gjejë punë ca njerëzve që mesa duke i paska pasur besnikët e saj që “maskoheshin” si të pavarur.
Kujtojmë që Alma Faskaj është shkarkuar nga detyra Këshilli i Lartë i Drejtësisë në vitin 1996, për shkelje të ligjit dhe paaftësi. Ky fakt, i rëndë për një profesionist, duket se është mbajtur i fshehtë në aplikimin që Faskaj ka qene pjesë e Komisionit të Pavarur të Kualifikimit.
Mes anëtarëve këtë kompani ndodhet edhe Olsi Coku ish-kryetari i Bordit të AMF që pas mbarimit të mandatit do të merret me “lulëzimin” e kanabisit në Shqipëri.
Në dokumentet e dorëzuara në qendrën kombëtare të biznesit, kompania ALBTrace CO një shoqëri me kapital të përbashkët ku 51% e aksioneve zotërohen nga Shtypshkronja e Letrave me Vlerë dhe 49% e aksioneve nga shoqëria e regjistruar në Emiratet e Bashkuara Arabe, O&S Security and Solutions LLP.
Vendimi i plotë:
V E N D I M PËR PËRCAKTIMIN E AUTORITETIT TË AUTORIZUAR PËR REALIZIMIN E SHENJIMIT DHE GJURMUESHMËRISË.
Në mbështetje të nenit 100 të Kushtetutës dhe të pikës 5, të nenit 34, të ligjit nr.61/2023, “Për kontrollin e kultivimit dhe përpunimit të bimës së cannabis-it dhe prodhimit të nënprodukteve të saj për qëllime mjekësore dhe industriale”, me propozimin e ministrit të Bujqësisë dhe Zhvillimit Rural dhe të ministrit të Shëndetësisë dhe Mbrojtjes Sociale, Këshilli i Ministrave
V E N D O S I: Autoriteti i autorizuar për realizimin e shenjimit dhe gjurmueshmërisë, sipas ligjit nr.61/2023, “Për kontrollin e kultivimit dhe përpunimit të bimës së cannabis-it dhe prodhimit të nënprodukteve të saj për qëllime mjekësore dhe industriale”, është shoqëria “ALBTrace Co”, sh.a.
Ngarkohen Ministria e Financave, Ministria e Shëndetësisë dhe Mbrojtjes Sociale, Ministria e Bujqësisë dhe Zhvillimit Rural, Agjencia Kombëtare e Kontrollit të Cannabis-it dhe shoqëria “ALBTrace Co”, sh.a., për zbatimin e këtij vendimi. Ky vendim hyn në fuqi pas botimit në “Fletoren zyrtare”’./ Boldnews.al
