Një operacion i policisë Italiane ka çuar në arrestimin e një 34-vjeçari shqiptar për trafik droge, si dhe të kunatit të tij, i cili ishte shpallur në kërkim për të njëjtën vepër penale.
Shqiptari u ndalua teksa udhëtonte me automjetin e tij dhe u shfaq i dyshimtë gjatë kontrollit. Në banesën e tij, karabinierët zbuluan 130 gramë kokainë të ndarë në doza, një peshore precize, lëndë prerëse dhe 180 euro cash të ardhura nga një shitje e dyshuar. Një pjesë e drogës ishte fshehur në një kuti duhani. 34-vjeçari, banues në Matelica, u vendos në arrest shtëpie në pritje të seancës dëgjimore.
Në banesë u gjetën edhe gruaja e tij, 31 vjeç, dhe vëllai i saj 35-vjeçar i cili, pavarësisht se jetonte në një provincë tjetër, rezultoi me urdhër ekzekutimi nga Gjykata e Apelit në Firence për një dënim të mëparshëm për trafik droge. Ai u kap në posedim të një sasie të vogël droge dhe 68,500 eurove cash dhe u dërgua menjëherë në burgun e Fermos.
Ndërkohë, edhe gruaja është përfshirë në hetime për pjesëmarrje në furnizim me lëndë narkotike dhe po hetohet në gjendje të lirë.
