Inflacioni në muajin qershor ka regjistruar nivelin më të lartë në 16 muaj. Gjate qershorit thotë INSTAT çmimet u rritën me 2.4%, dhe shkaku kryesor ishte shtrenjtimi i ushqimeve. Nga zarzavatet, vaji, qumështi e mishi të gjitha po kushtojnë më shumë edhe pse në sezon prodhimi.
“Shiko, 1 mijë lekë kumbulla në vaktin e veti. Rrushi. Gjithçka shtrenjtë dhe pse jemi në stinën e tyre”, shprehet një qytetar.
Në një vend ku dielli ndriçon çdo cep të tokës dhe tregjet janë plot me domate, zarzavate e fruta vere, çmimet po ngjiten si të ishim në mes të dimrit! Inflacioni i qershorit ka shënuar nivelin më të lartë në 16 muajt e fundit, me 2.4 për qind rritje.
“Periudha e fruta-perimeve. nëse do të krahasonim këtë qershor me qershorin e shkuar, patën çmime më të larta. Nuk është perceptim, por realitet”, deklaroi për A2 CNN eksperti për ekonominë Klodian Muço.
Por mos mendoni se janë lukset që po na rëndojnë xhepat… Jo! Janë pikërisht buka, qumështi, vaji dhe mishi… pra vetë shporta e mbijetesës. Inflacione te ushqimet kapërceu “vijën e kuqe” muajin e shkuar duke arrit në 3.5 për qind.
Sot në tregjet e Tiranës domatet shiten me 150 lekë/kg, kastraveci me 100 lekë/kg, patate e qepë midis 80-100 lekë/ kg apo specat deri në 180 lekë/kg. Po kështu shalqiri është fiksuar në 50 lekë/kg e pjepri në 100 lekë.
“Është një periudhë historikisht me inflacion në rritje për shkak të shtimit të konsumit si pasojë e ardhjes së shqiptarëve në Atdhe, por edhe nga turizmi”, u shpreh eksperti Klodian Muço.
Dhe sipas ekspertëve, inflacioni do të ishte edhe më i lartë nëse Shqipëria nuk do të përjetonte plakje të popullsisë me këto ritme.
“Pensionistët janë më të predispozuar të konsumojnë pak gjëra. Ndryshe nga një qytetar mesatar i cili blen ushqime, veshje e etj.”, theksoi Muço.
Me gjithë flukset e shtuara të turistëve, inflacioni te baret dhe restorantet në qershor ra në 1.7 për qind nga 1.8 për qind në maj./ A2 CNN
