Edi Rama ka sulmuar sot të gjithë Prokurorinë e Shkodrës, pasi kjo e fundit, përmes një komunikate për mediat, i rrëzoi akuzat kryeministrit që hodhi dje në drejtim të prokurores Elsa Gjeli, duke pretenduar se ajo kishte vendosur mosfillimin e një çështjeje penale ndaj një serie kabinash pushimi të ndërtuara pa leje pranë kishës së fshatit në Theth.
Përmes një video-live në rrjetet sociale, Rama tha se Ministria e Drejtësisë po bën dokumentacionin gati për të depozituar kallëzim në KLP, jo vetëm ndaj prokurores Elsa Gjeli, por ndaj të gjithë Prokurorisë së Shkodrës.
Pra për ndërtimet në Theth, Rama merret sikur e ka fajin vetëm drejtësia dhe jo institucionet lokale, edhe pse iu sqarua qartë se për rastin në fjalë nuk kemi të bëjmë me një vepër penale, por administrative.
“Është shqetësuese ajo që ka ndodhur në Theth, ku strukturat e shtetit që kanë vepruar janë lënë në baltë nga një prokurore dhe Prokuroria e merr edhe në mbrojtje. Ministria e Drejtësisë po bën gati dokumentacionin që të kërkojë në KLP hetim për prokuroren, por edhe për të gjithë Prokurorinë e Shkodrës, sepse realisht është shumë shqetësuese ajo që ka ndodhur në Theth. Këta njerëz në shkollë bëjnë edhe një lëndë që quhet logjikë, në arsyetimet e tyre vetëm logjikë nuk ka. Ajo mungesë logjike në një organ themelor të zbatimit të ligjit, përkthehet në dëme shumë të mëdha për komunitetin, individët, për pasurinë tonë të përbashkët, për imazhin e vendit. Çfarë imazhi është ky në sytë e atyre qindra turistëve që dje edhe sot në Theth shikojnë fadromat, që shkojnë atje për të pastruar plagën e hapur nga një individ totalisht i papërgjegjshëm, që ka kryer krim të shumëfishtë atje dhe që ende tani që flasim nuk dihet kush është sepse prokurorja Gjeli, e ka lënë të lirë duke mos vendosur mosfillimin e çështjes, dmth ka vendosur të mos bëjë asnjë hetim”, – tha Rama.
