Pas Vlorës dhe Fierit, kryeministri Edi Rama ka mbërritur sot në bashkinë e Durrësit, ku ka zhvilluar një tjetër mbledhje me tone të ashpra ndaj drejtuesve vendorë dhe të institucioneve që varen nga kjo bashki.
Sipas Top Channel, Rama u ka kërkuar dorëheqjen të gjithë drejtorëve të bashkisë dhe drejtuesve të institucioneve që, sipas tij, nuk kanë përmbushur detyrat dhe nuk kanë reflektuar mbi përgjegjësitë që mbajnë.
Ndërkohë, News24 raporton se Rama ka kërkuar që të zëvendësohen të gjithë drejtorët aktualë, por vendimi përfundimtar për shkarkimin e tyre do t’i mbetet kryetares Emiriana Sako, bazuar në vlerësimin e performancës së secilit.
Në takim ishin të pranishëm edhe deputetët e qarkut Durrës, ndërsa përpara mbërritjes së kreut të qeverisë, bashkia ndërmori një aksion për lirimin e hapësirave publike – pjesë e fushatës së nisur prej Ramës në të gjithë vendin.
Kryeministri e nisi këtë tur me Bashkinë e Vlorës, ku u larguan 21 drejtues dhe iu dha ultimatum bizneseve për të liruar trotuaret. I njëjti mesazh u përcoll edhe në Fier dhe Durrës, ku Rama theksoi se “besimi i marrë me votë duhet kthyer në shërbim dhe respekt për qytetarët”.
Ndërhyrjet e Ramës në pushtetin vendor vijnë në një kohë kur debati mbi autonominë vendore është rikthyer, por kryeministri duket i vendosur të çojë përpara reformën e tij për administratën lokale në çdo bashki ku, sipas tij, puna nuk ecën siç duhet.
