Luan Baçi, nga ambientet e burgut në Fier, ka reaguar pas vendimit për lirimin e Ervin Salianjit.
Ai e ka cilësuar arrestimin e tij si një akt politik dhe Salianjin si një “të burgosur politik”. Sipas Baçit, burgosja e politikanëve të opozitës është pjesë e një strategjie për të goditur zërat kundërshtarë. Ai shtoi se Salianji mezi pret të rikthehet në radhët e PD për të vijuar betejën opozitare.
“Salianji ka qenë një i burgosur politik. Kjo burgosje është vazhdimësi e burgosjes të politikanëve të opozitës nga regjimi. Ervin Salianji u burgos padrejtësisht. E kam takuar, jam futur brenda në ambientet e burgut. Me padurim pret të dalë, që t’i bashkohet ekipit të PD-së, që të vijojë luftën opozitare, që Salianji ka dhënë shembull se e bën mirë, si rrallë kush. E prisnim lirimin, sepse çdo i dënuar që bën 2/3 e dënimit pritet të lirohet.
Salianji ishte i burgosur politik. Salianji u hoq nga skuadra e PD dhe kjo ishte një goditje për Partinë Demokratike. PD ka marrë shumë goditje, ne kemi kryetarin demokrat Sali Berisha që thirret në SPAK, edhe Fatmir Mediu goditet nga regjimi, edhe Ilir Meta. Të gjitha kanë qenë goditje të opozitës, për të përjetësuar pushtetin e Ramës”, tha Baçi nga burgu i Fierit për News24.
Mbështetësit e Ervin Salianjit janë mbledhur sot para Burgut të Fierit pas vendimit të Gjykatës së Fierit për ta liruar ish-deputetin pas 9 muajve burg.
Mes tyre edhe deputeti i qarkut Fier, Luan Baçi, krerë të strukturave të PD-së dhe qytetarë.
Pas kryerjes së procedurave të rastit, ish-deputeti la ambientet e burgut të Fierit.
