Në gusht të vitit 2015, Erion Veliaj nisi aksionin për lirimin e të gjitha hapësirave publike të zaptuara nga tregtarët, lokalet apo ambulantët e ndryshëm.
Veliaj u deklarua i prerë për ta fituar betejën dhe për ti kthyer qytetarëve rrugët, trotuaret, lulishtet dhe çdo ambient tjetër publik, por koha e tregoi se e gjitha ishte thjesht një show mediatik.
“Ky është një operacion që nuk i lë të gjithë të lumtur dhe sigurisht për çdo veprim që ne marrim dhe për çdo pengesë që ne heqim, është dikush që mërzitet. Kjo se në këto vitet e fundit gjej shesh dhe bëj përshesh ishte politika e ditës në qytet. Por ju garantoj që për çdo njeri që mërzitet nga zbatimi i ligjit janë me qindra apo mijëra të tjerë që i gëzohen zbatimit të ligjit. Dhe shumica e qytetarëve e duan ligjin dhe shtetin”- shprehej Veliaj asokohe.
Sot, 10 vite më pas, Rama po kopjon të njëjtën taktikë të Veliajt që shumë shpejt do lihet në harresë dhe aksioni “gjigand” i liderit do demonstrojë atë që pritet, dështimin!
Me urdhër të Edi Ramës, një aksion i gjerë për lirimin e hapësirave publike të zaptuara padrejtësisht nga biznese apo individë të ndryshëm nisi nga Vlora dhe u përhap në mbarë vendin.
“S’ka më tokë e xanun. Hiqini vetë ato trarë, mblidhni plaçkat dhe lironi hapësirat e përbashkëta midis pallateve. Do ndërhyjmë me gjoba dhe ndjekje penale,” – paralajmëroi Rama në një video live.
Por, vetëm pak ditë pas nisjes së aksionit të urdhëruar nga lideri, u denoncua edhe dështimi i nismës. Konkretisht, një grup i “Taks Forcës” së Tiranës mësyu ditën e djeshme rreth orës 10:00 në zonën e Pazarit të Ri në Tiranë. Menjëherë pasi punonjësit e “Taks Forcës” u larguan, te ky lokal që ndodhet në hyrje të pazarit, punonjësit filluan të mbërthejnë përsëri tendat dhe të nxjerrin jashtë tavolinat, duke u bërë sërish zaptues të hapësirës publike.
