Rasti i vdekjes së 27-vjeçarit Agon Zejnullahu në Lipjan, pas një ndërhyrjeje policore, ka shkaktuar reagime të forta në opinionin publik dhe ndërkombëtar. Shefi i Misionit të EULEX-it në Kosovë, Giovanni Pietro Barbano, ka kërkuar hetim të plotë dhe transparent për ngjarjen, ndërsa ka theksuar nevojën për qartësi institucionale dhe përgjegjësi ligjore.
Prokuroria ka cilësuar ngjarjen si “vrasje nga pakujdesia” dhe ka ndaluar për 48 orë pesë zyrtarë policorë të përfshirë në operacionin që çoi në vdekjen e të riut. Megjithatë, fakti që rasti nuk është përfshirë në raportin ditor të Policisë së Kosovës ka shtuar dyshimet për mungesë transparence.
Agon Zejnullahu ka ndërruar jetë me pranga në duar, në prani të disa efektivëve, në rrethana ende të paqarta. Sipas raportit mjekësor, shkaku i vdekjes dyshohet të jetë ndrydhja trupore, ndërsa familjarët e tij pretendojnë se trupi kishte mbi 20 shenja dhune dhe dëmtime të rënda.
Ngjarja ka tronditur opinionin publik dhe ka sjellë reagime të ashpra nga organizatat e të drejtave të njeriut, të cilat kërkojnë zbardhje të menjëhershme të rrethanave dhe vendosjen e përgjegjësve para drejtësisë.
