Kryeministri i Kosovës, Albin Kurti, ka reaguar pas kërcënimit me bombë të ndodhur një ditë më parë në ambientet e Kuvendit të Kosovës. Ai ka ndarë në rrjetet sociale deklaratën e ministrit të Brendshëm, Xhelal Sveçla, duke përgëzuar institucionet për reagimin e shpejtë dhe profesional.
Kurti theksoi se konfirmimi se kërcënimi kishte origjinën nga Serbia është dëshmi e qartë e luftës hibride që, sipas tij, Serbia po zhvillon ndaj Kosovës.
“Përgëzoj institucionet shtetërore për reagimin e shpejtë dhe profesional. Konfirmimi se ky kërcënim e ka origjinën në Serbi dëshmon edhe një herë luftën aktive hibride të Serbisë ndaj vendit tonë”, u shpreh Kurti.
Ndërkohë, ministri Sveçla deklaroi më herët se kërcënimi me bombë është bërë përmes një thirrjeje telefonike nga një numër i regjistruar në kompaninë serbe të telefonisë MTS. Sipas tij, përdoruesi i këtij numri është identifikuar si Lazar Zivkoviç.
