Nga Boldnews.al
Me një lëvizje emocionale, por gjithësesi të pakuptimtë, Operatori i Blerjeve të Përqëndruara (OBP) ka vendosur të rikonfirmojë të dhënat e publikuara nga “Boldnews.al” për një tender për blerje gomash, me fond limit 1 milionë euro, megjithëse këtë qëndrim e ka emërtuar si “përgënjeshtrim”.
“Boldnews.al” ka raportuar më herët se OBP ka shpallur rezultatet për procedurën e prokurimit publik, me objekt “Blerje goma për automjete-Loti I”, me fond limit 105.430.899 lekë të reja.
Raportimi shoqërohet me dokumentat zyrtare të publikuara nga Operatori i Blerjeve të Përqëndruara, një strukturë qeveritare nën drejtimin ekzekutiv të Arlinda Pogaj.
Artikulli theksonte se “sipas dokumentave zyrtare, fituesi paraprak i kësaj procedure është shoqëria “Tires-R”, e cila nuk ka paraqitur ofertën më të ulët. Kompania “Tires-R” është në pronësi të biznesmenes Blerta Nika, e cila rezulton paralelisht edhe administratore në shoqërinë “RA-MI” shpk, e përfshirë në skandalin e blerjes abuzive të një zjarrëfikëseje për Bashkinë e Durrësit, me vlerë 7 milionë lekë të reja”.
Pas publikimit të artikullit, Operatori i Blerjeve të Përqëndruara ka bërë një reagim publik në profilin e tij zyrtar në rrjetin social, “Facebook”, me titull: “Reagim zyrtar ndaj artikullit të publikuar në portalin “Boldnews.al” për procedurën e prokurimit me objekt: “loti 1 – blerje goma për automjete” (nr. reference: ref-46801-05-02-2025)”.
Në këtë reagim, Operatori i Blerjeve të Përqëndruara shprehet se procedura ishte transparente, ka pasur pjesëmarrje të disa operatorëve ekonomikë dhe se “bashkimi i operatorëve X…Y, ndonëse me ofertën më të ulët, është skualifikuar për mospërmbushje të dy kritereve të detyrueshme”.
Më tej, Operatori thotë se “Operatori “Tires-R” sh.p.k, i shpallur fitues paraprak, ka paraqitur ofertën prej 79,073,200 lekë (pa TVSH), që përbën një ulje prej 24.99% ndaj fondit limit. Kjo ulje përkthehet në një kursim real prej 26,357,699.3 lekë për buxhetin e shtetit….”.
Pra, është një situatë, në të cilën “Boldnews.al” thotë se në tenderin me fond limit 1 milionë euro është shpallur fituar paraprak kompania që nuk ka paraqitur ofertën më të ulët dhe, nga ana tjetër, Operatori i Blerjeve të Përqëndruara e pranon se shoqëria fituese nuk ka dhënë ofertën më të ulët.
Në këto kushte, është tërësisht e paqartë se cila është pjesa që Operatori i Blerjeve të Përqëndruara vlerëson si abuzive dhe e titullon “fake news”, kur dokumentat zyrtarë, por edhe vetë “përgënjeshtrimi” i tij pranojnë të dhënat e raportimit nga “Boldnews.al”.
Kompania fituese e tenderit me fond 1 mln euro wshtw “Tires-R”, nw pronwsi tw Blerta Nika. Kjo e fundit rezulton ende formalisht si administratore nw shoqwrinw ‘RA-MI” shpk.
Në tetor të vitit 2021, me urdhër të Prokurorisë së Posaçme (SPAK), u arrestuan disa zyrtarë të Bashkisë së Durrësit, si edhe përfaqësues të disa shoqërive private, të akuzuar për “Shkelje të barazisë në tendera”.
Sipas atij hetimi të SPAK-ut, zyrtarët dhe përfaqësuesit e kompanive private kishin abuzuar me një tender në vlerë 7 milionë lekë të reja për blerjen e një zjarrëfikëseje për nevojat e Shërbimit të Mbrojtjes Kundër Zjarrit në bashkinë e qytetit bregdetar.
Sipas njoftimit të shpërndarë në atë kohë nga SPAK-u, rezulton se u miratuan masa sigurimi nga gjykata dhe u arrestuan zyrtarët Adriatik Velaj, Muhamet Likazhi, Artan Taho, Patriot Beqaraj, Indrit Matmuja dhe Gjergj Metkola.
Po ashtu, u caktuan “detyrim paraqitje për për Elona Rami, pronare e “R& R Group”; masa “arrest shtëpie” për Lulzime Rami, përfaqësuese e “Klosi R-Company”, si edhe “arrest në burg” për Albion Bushi, pronar i “RA-MI Company” shpk.
Administratore e kompanisë së fundit në radhë, “RA-MI” shpk ishte në atë kohë dhe vijon të jetë ende zyrtarisht Blerta Nika, e cila aktualisht zotëron “Tires-R” shpk dhe që u shpall së fundmi fituese e tenderit me fond 1 milionë euro të Operatorit të Blerjeve të Përqëndruara.
LEXO EDHE:
Arlinda Pogaj i jep 1 mln € për goma Blerta Nikës, “shefe” e skandalit në zjarrfikësen e Durrësit
