Situatë kaotike është krijuar në pikën kufitare Qafë-Botë.
Pas arrestimit të 14 doganierëve grekë të dyshuar për përfshirje në kontrabandë mallrash, kontrolli kufitar në anën greke është ngadalësuar ndjeshëm.
Qytetarët që hyjnë nga Greqia në Shqipëri po përballen me radhë të gjata dhe pritje prej disa orësh.
Aktualisht, pala greke po operon vetëm me dy sportele dhe me një staf të reduktuar prej tre doganierësh, duke shkaktuar vonesa të mëdha për udhëtarët. Pritjet shkojnë deri në tre orë, ndërsa radhët e makinave janë kilometrike.
Në anën shqiptare të pikës kufitare, puna vazhdon normalisht me tre sportele aktive, por fluksi i lartë dhe ngadalësia nga pala greke po krijojnë bllokime të konsiderueshme.
Kujtojmë se shkak për këtë kaos dhe bllokim disa ditore është bërë arrestimi i 14 doganierëve grekë, përfshirë 7 burra dhe 7 gra, mes tyre edhe shefi i doganës. Ata akuzohen për përfshirje në një grup të organizuar kriminal dhe për marrje ryshfeti në bashkëpunim. Sipas njoftimit zyrtar të Policisë greke, grupi kriminal i përbërë nga punonjës të Autoritetit Doganor merrte përfitime të paligjshme financiare në këmbim të moskryerjes së kontrolleve doganore. Dosja hetimore përmban mbi 2,000 faqe materiale, duke përfshirë video, fotografi dhe biseda të regjistruara që zbulojnë skemën e korrupsionit.
