Teksa debati mes Edi Ramës dhe politikanit britanik Nigel Farage ka marrë vëmendjen e opinionit publik, gazetari shqiptar Arben Manaj, i cili jeton në Mbretërinë e Bashkuar, ka deklaruar se grupet shqiptare në rrjetet kriminale të drogës në Londër, janë mbizotërueses në vend.
Manaj thekson se nuk duhet të fshihemi pas gishtit dhe të pretendojmë se nuk ka një problem real me përfshirjen e shqiptarëve në aktivitetet kriminale.
Ai thotë se për shkak të punës së tij si përkthyes zyrtar në gjykata dhe stacione policie, ka mësuar se 95% e shqiptarëve janë të ndaluar për posedim me qëllim furnizimin dhe shpërndarjen e drogës.
“Ne nuk duhet të fshihemi pas gishtit e të themi që nuk ka krim në Londër, mos të harrojmë që grupe shqiptare të krimit, drogës, janë mbizotërueses dhe sipas të dhënave, mendohet se 2-4 miliardë janë të ardhura gjenerohen nga kokaina dhe kanabisi.
Të mos harrojmë që nga 1995, kanabisi mbetet droga kryesore që përdoret nga britanikët. Kështu që është e vërtetë. Unë merrem përditë me kriminogjenët shqiptarë se jam edhe përkthyes zyrtar, shkoj nëpër gjykata, stacione policie, dhe jua them me bindje se 95% e shqiptarëve që arrestohet dhe paditen nëpër gjykata, janë për posedim me qëllim furnizimin dhe shpërndarjen e drogës dhe kanabisi, janë edhe këta shitësit e vegjël që marrin makina me qira“, tha gazetari Arben Manaj në News24.
