Gjykata e Lartë ka rrëzuar rekursin e ish-efektivit të “Shqiponjave”, Nevaldo Hajdaraj, duke i lënë në fuqi dënimin e dhënë nga Gjykata e Apelit me 18 vite burgim, ku nga gjykimi i shkurtuar i ulet në 12 vite burgim.
Ai është shpallur fajtor për vrasjen e të riut Klodian Rasha, të cilin e ekzekutoi me armën e shërbimit dhe gjatë kryerjes së detyrës,në orët e para të mëngjesit të 8 Dhjetorit 2020 në rrugicën pranë shtëpisë së viktimës.
Gjithashtu, Gjykata e Lartë ka rrëzuar edhe rekursin e Prokurorisë së Apelit, e cila kërkonte dënimin me 20 vite burgim, dënimi maksimal që parashikon neni 76 i Kodit Penal, dhe mos pranimin e gjykimit të shkurtuar për ish-efektivin.
Ngjarja fillimisht u tentua të manipulohej nga Policia e Shtetit e drejtuar në atë kohë nga Ardi Veliu, ku shpërndanë lajmin në media se viktima ishte i armatosur dhe se ishte gjetur një pistoletë.
Por, nga pamjet filmike rezultoi se ish-efektivi Nevaldo Hajdaraj, e kishte qëlluar nga një distancë e afërt prej 5 metrash pas shpine Klodian Rashën, teksa ky i fundit ishte duke vrapuar, për shkak se nuk lejoheshin lëvizjet gjatë natës për shkak të pandemisë. Nga filmimet rezultoi se ish-polici i pozicionuar i shtrirë në trotuar ka hapur dy herë zjarr drejt tij.
Vrasja e Rashës u pasua nga një revoltë e qindra të rinjve në rrugët e Tiranës. Dhjetëra prej tyre u arrestuan më pas për protestë të paligjshme, ndërsa i vendosur nën presion publik Ministri i Brendshëm i kohës, Sandër Lleshaj dha dorëheqjen.
Veç çështjes ndaj Hajdaraj, një tjetër hetim është në vijim i lidhur me këtë rast dhe ka të bëjë me dyshimet se pati një përpjekje për të manipuluar ngjarjen.
