Analisti Andi Bushati, i ftuar në emisionin “Të Paekspozuarit” ka folur për çështjen e Bankers Petroleum Albania, ku Prokuroria e Fierit lëshoi 14 urdhër-arreste për evazion fiskal dhe pastrim parash.
Bushati tha se kemi të bëjmë me një aferë korruptive dhe se ka 20 vite që del naftë nga toka e Shqipërisë por qytetarët nuk marrin asgjë mbrapsht. Bushati shtoi se fakti që autoritetet janë kujtuar pas 20 vitesh, do të thotë se mund të jetë duke u përgatitur një aferë e re, e cila do kuptohet ditët në vijim.
“Problemi është, fryrja e kostove, sepse në kontratë, që është bërë që në qeverinë Nano, ishte parashikuar, nuk do të paguajnë tatim pa larë investimet. Pavarësisht nga detajet dhe loja e Prokurorisë, ka një pyetje, e mbani mend para një viti e gjysmë, veshi Rama rrobat e kuqe dhe vuri kapele, tha do të zbulojnë naftë Shell? Ajo naftë nuk u gjet, qe mashtrim. Historia e Bankers na tregon se kemi dhënë një pasuri të madhe kombëtare. Një shtet serioz që jep një pasuri, vë kronometrin, por kemi 20 vjet që del naftë nga toka dhe nuk kthehet asgjë mbrapsht, pastaj këtu nuk do mend që kemi aferë korruptive.
E para, pse nuk është ndërhyrë? Dhe e dyta, pse ndërhyhet tani? Besoj në ditët e ardhshme do të kemi mundësinë të kuptojmë pse u kujtuam tani? E di atë që bënë mbrapa 15 katëshit, ia morën pronarëve tokat, bënë një nën central, e mbajtën pak dhe pastaj e hoqën, ia dhanë një private. Kjo është skema. Kur nuk je kujtuar 20 vjet, e para na tregon se kemi korrupsion, e dyta kemi dyshimin që mund të jetë korrupsion mbi korrupsion”, deklaroi Bushati.
