Pas 17 vitesh mister, autoritetet italiane kanë zbuluar kokën e një kufome, e cila ishte gjetur më 21 shkurt 2008 brenda një kuti kartoni buzë autostradës Brennero.
Rasti, që prej vitesh mbetej i pazgjidhur për prokurorinë e Bolzanos, tashmë ka marrë një kthesë të re falë hetimeve të autoriteteve gjermane dhe bashkëpunimit me kolegët italianë.
“La Repubblica” raporton se trupi i pajetë është identifikuar së fundmi si Mustafa Sahin, një i ri i vrarë në Gjermani nga vjehrri i tij, Alfonso Porpora, 61 vjeç. Ky i fundit nuk e kishte pranuar kurrë lidhjen e vajzës së tij me Sahin, pavarësisht se e kishte detyruar atë ta martonte pasi kishte mbetur shtatzënë.
Sipas hetuesve, vrasja ka ndodhur në qytetin gjerman Sontheim an der Brenz, ku Porpora më pas ka ngarkuar trupin në makinë dhe e ka braktisur pranë autostradës në Itali. Ai ka rrëfyer ngjarjen gjatë një qëndrimi në burg në Gjermani, ku ndodhet i dënuar edhe për dy vrasje të tjera: një tjetër partner të vajzës dhe një 59-vjeçar të cilit i kishte dhënë një banesë me qira.
Megjithatë, Porpora nuk ka pranuar kurrë se e ka prerë kokën e viktimës dhe nuk ka dhënë asnjë informacion për vendndodhjen.
Zbulimi i kokës ka ndodhur krejt rastësisht nga pronari i ri i shtëpisë, ku dikur banonte autori i krimit. Ai ka gjetur një kafkë nën disa pllaka betoni, për të cilën hetuesit dyshojnë se i përket Sahin. Për të konfirmuar identitetin, do të kryhen analiza ADN-je dhe ekzaminime të tjera mjeko-ligjore.
Rasti i rëndë ka tronditur opinionin publik në Itali dhe Gjermani, ndërsa autoritetet shpresojnë se së shpejti do të kenë prova të mjaftueshme për të mbyllur përfundimisht këtë çështje që ka zgjatur thuajse dy dekada.
