Ish-Presidenti Ilir Meta në një telefonatë të drejtpërdrejtë për avokatin Kujtim Cakrani, foli në MCN Live mbi hetimet e SPAK, duke u shprehur se nuk ka përdorur kurrë kartë në jetën e tij.
Meta tha që uroj të mos jenë të vërteta as pretendimet e SPAK-ut për Kryemadhit, pasi do të ishte e rëndë për një politikane me përvojë, e cila ishte këshilluar gjithmonë prej tij të ishte e kujdesshme me ligjin.
“Unë s’e di se sa karta ka pasur znj.Kryemadhi. Ajo ka pasur shumë pasuri edhe për shkak të një pallati bashkë me nënën e saj, që janë të deklaruara, të ligjshme. Unë në jetën time kurrë s’kam pasur kartë edhe për shkak të pozicioneve që kam pasur. E vetmja kartë që kam marrë ishte 4 ditë para se të më rrëmbenin. Kartat që pretendon SPAK-u, janë karta ekskluzive sipas vet SPAK-ut për znj. Kryemadhi, s’kanë lidhje me z.Meta. Po kështu vendet ku SPAK-u pretendon se janë bërë shpenzime me këto karta, janë vende që as kam qenë, as kam ndërmend të shkoj, Beverly Hills apo Las Vegas. S’jam njeri i kazinove, gjërave luksoze, më pëlqen Prevalla. Jam i lidhur me natyrën. S’kam pasur kurrë ndonjë dijeni. Uroj të mos jenë të vërteta, sepse nëse janë të vërteta janë të papranueshme dhe të rënda për një politikane me përvojë, që ka qenë e këshilluar nga ana ime, që të jetë shumë e kujdesshme me ligjin. S’kanë asnjë lidhje këto karta me mua, shpërndahen nga gazetaret e SPAK-ut”.
Duke folur mbi çështjen e lobimit në SHBA, Meta tha që SPAK-u qëllimisht nuk tregon se kujt ia ka çuar kompania faturat.
“Nuk e sqaron SPAK-u qëllimisht, dhe që ne ia kërkuam edhe në seancën e gjykimit prokurorit të çështjes, i cili ka tre vjet që heton. Ai pretendon për një kompani që ka pasur kontratë të ligjshme me LSI, e firmosur nga një titullar i kësaj partie, jo nga unë, dhe pretendon se ajo kompani i ka faturuar LSI-së në 2017-ën kur unë kam qenë President një shumë të madhe që s’korrespondon me shumat e depozituara në KQZ sipas ligjit nga kjo parti. Qëllimisht SPAK-u s’na thotë kujt personi në LSI kjo kompani ia ka çuar këto fatura, se ky është personi kyç. Unë po ta dija s’e kisha lejuar një veprim të tillë, sepse s’mund të lejoheshin veprime në kundërshtim me ligjet shqiptare dhe amerikane. Në rast se ky pretendim që ngre SPAK-u është i vërtetë, që janë bërë pagesa për llogari të LSI te kjo kompani apo një tjetër, të cilat s’janë depozituar në KQZ, dhe s’janë miratuar në kryesinë e LSI, padyshim që kemi të bëjmë me veprime të paligjshme, me vepra penale, dhe ata që i kanë bërë këto vepra janë edhe ata që mbrohen duke mos na i dhënë të plotë faktet. Sepse duhet dhënë fakti. SPAK-u na flet qëllimisht kujt ia ka çuar kjo kompani këto fatura, personit”, tha presidenti i PL.
Meta tha se nuk është penduar për retorikën e përdorur ndaj SPAK-ut, duke u shprehur se madje ajo ka qenë e butë. Presidenti i PL tha që SPAK-u është kthyer në instrument për shkatërrimin e demokracisë.
Meta tha se arrestimi i Veliajt ishte model, ndërsa arrestimi i tij u bë në atë mënyrë, sipas tij “për të trembur shqiptarët”./ MCN
Lexo edhe:
Meta e Kryemadhi shpenzuan 240 mijë dollarë nga karta e biznesmenit, ja ku u kryen pagesat
