Ish-zv.komandanti i Forcave Detare Artur Meçollari, ka komentuar deklaratat e presidentit të SHBA, Donald Trump se parandaloi një luftë të mundshme mes Kosovës dhe Serbisë.
Meçollari tha se qeveria shqiptare duhej të kishte përfituar nga kjo deklaratë dhe të kishte mbështetur presidentin amerikan, pasi Beogradi shihet si kërcënuese e sigurisë në rajon.
Kjo gjë sipas tij vërtetohet edhe nga sulmi në Banjskë. Meçollari thekson se mesazhi i Trump nxori qartazi Serbinë si faktor destabilizues.
“Kur flitet për luftë njerëzit kujtojnë se ushtria rreshtohet dhe futet në territor. Ky është rasti klasik. Por nuk është i vetmi. Mund të jetë dhe përdorimi i forcave paramilitare që ka të njëjtën efekt si akti i luftës. Rezoluta 33 14 e OKB e ka të qartë se kush janë akte lufte. Presidenti e ekzagjeron por ai ka folur për një akt lufte. Mesazhi nxjerr një gjë të qartë se Serbia është destabilizuese e Ballkanit. Është e vetmja që akuzohet për një akt lufte nga presidenti SHBA. Por këtu vijmë te fakti se Serbia e mohoi se ka një akt lufte por nuk iu kundërvu presidenti Trump. Mohoi faktin. Ne ç’duhet bëjmë?
Që Serbia është kërcënues e sigurisë në Kosovë, është fakt. Kemi Banjskën. Kemi goditjen e linjës së ujit. Kemi gjetje armatimi. Terrorist të arrestuar, Serbia ka kapacitet për të destabilizuar Kosovës sepse e ka demonstruar. Deklarata e Trump ka një bazë në kuptimi ne mesazhin që jep. Ne nuk e kapëm. Në fakt këtu është roli. Qeveria e Kosovës ka një sërë kufizimesh në deklarata. I ka duart e lidhur prej KFOR. Por qeveria shqiptare nuk i ka duart e lidhur a për të bërë deklarata. Presidenti Erdogan e bëri një deklaratë në mbështetje të presidentit Trump. Pse qeveria shqiptare dhe ajo e Kosovës nuk e mbështetën këtë deklaratë që të përfitonin nga kjo deklaratë. Qeveria shqiptare duhej ta kishte bërë dhe të kishte dalë në mbështetje të qeverisë së Kosovës“, tha Meçollari në News24.
