NJë 29-vjeçar shqiptar është arrestuar nga autoritetet italiane, pasi akuzohet për trafik të lëndëve narkotike.
Mediat përtej Adriatikut raportojnë se në banesën e shqiptarit në Vigevano janë gjetur dhe sekuestruar 27 kilogramë lëndë narkotike. Më konkretisht, 22 kilogramë kanabis, të ndarë në 122 pako dhe ishin fshehur brenda në frigorifer.
Si dhe 5 kilogramë kokainë, e paketuar në blloqe me imazhin e Al Pacinos në filmin Scarface ose në qese të mbyllura me nxehtësi, të cilat ishin shpërndarë në vende të ndryshme të banesës.
Hetimet u drejtuan nga karabinierët e Xhenovës, të cilët kishin vënë re shqiptarinme sjellje të dyshimta dhe e ndoqën deri në banesën e tij, në një apartament në qytetin Vigevano.
Pak ditë më parë, me ndihmën e kolegëve të Kompanisë së Vigevanos, i riu u ndalua dhe iu gjetën 58 gramë kokainë me vete. Më pas u krye kontrolli në banesë, ku u zbulua edhe sasia e madhe e drogës. Në shtëpi u gjetën gjithashtu 7 mijë euro cash, të cilat dyshohen se janë përfituar nga aktiviteti i shpërndarjes së drogës.
29-vjeçari u arrestua dhe u dërgua në burgun e Pavias, ku ndodhet në pritje të seancës për konfirmimin e arrestit.
