Një nismë e qeverisë për të shndërruar një zonë ushtarake në Bulqizë në hotele dhe lokale, duke e quajtur Parku Retro, do të “hajë” edhe plot 2.7 milionë euro, duke e çuar koston totale në plot 6 milionë euro. Kreu i Fondit Shqiptar të Zhvillimit, “biznesmeni” Dritan Agolli nuk e ka harruar që në çdo investim publik të ndërtojë me lekët e shtetit hotele, restorante dhe lokale.
Një nismë kurajoze e vetë Agollit, ku në çdo vend duke filluar nga llixhat e Përmetit, Saranda, Petrela apo edhe tani Bulqiza, të ndërtojë modelet e biznesit që operon familja e tij. Kujtojmë se djali i Agollit zotëron një restorant luksoz në Hamallaj, ndërkohë që edhe pjesëtarë të tjerë të familjes së tij janë përfshirë në biznese fitimprurëse.
Normalisht, zhvillimi i zonave të tilla mirëpritet nga banorë vendas apo edhe turistë, por prapaskenat me të cilat vepron vetë Agolli, duke qenë se favorizon gjithmonë “klientët” e tij, kanë sjellë që ccdo vepër e ndërtuar të përfundojë në duart e një grupi të ngushtë njerëzish. Ka dyshime se, edhe tenderi i ri i Parkut Retro në Bulqizë të përfundojë te e njëjta dorë që fitoi edhe lotin e parë.
Dokumenti i mësipërm është njoftimi i hapjes së tenderit të ri për Parkun Retro në Bulqizë. Objekti i procedurës së prokurimit është “ndërtimi i infrastrukturës se modeleve të integruara në zona me potencial zhvillimi, Bulqizë”. Bëhet fjalë për “parkun tematik Retro, Bulqizë ‘divizioni’, loti 2”. Fondi limit për këtë tender është 271 milionë lekë, ose pak më shumë se 2.7 milionë euro, ndërsa mësohet se procedura është gati për t’u tenderuar.
Por, çfarë pason ky tender i ri?!
VoxNews shfletoi dokumente të vjeshtës së vitit 2024 ku rezulton se FSHZH-ja hapi tenderin e projektit, i cili synonte të rikthente ish-zonën ushtarake në një destinacion turistik dhe kulturor. Në atë kohë fond limit ishte 338 milionë lekë, ndërkohë që në muajin tetor 2024 u shpall edhe fituesi i tenderit, kompania “Ulza”. Në tenderin e parë saktësohej se afati i punimeve ishte 24 muaj, ndërkohë që pa kaluar as 12 muaj u hap një tender i ri.
Dyshimet janë se, tenderi i ri është një shtesë e procedurës së parë. Por, përse tani? A është i paracaktuar?
Sipas dokumenteve shoqëruese, Fondi shkruan se projekti përfshin rikualifikimin e “Retro-Hotel” në ish-shtëpinë e Oficerëve, si dhe tetë banesave dykatëshe që ndodhen në të njëjtën zonë. Ndërtesa kryesore, ish-shtëpia e Oficerëve, ka një sipërfaqe prej 490 m² për kat dhe përbëhet nga dy deri në tre kate.
“Projekti synon të sjellë dhoma hoteliere të stilit retro, dhoma me kapacitet të lartë për qëndrime në grup (hostel), si dhe një dhomë muzeale që përmban mobilim dhe teknologji nga periudha komuniste. Gjithashtu, në plan është integrimi i njësive të reja për mëngjes dhe kafeteri, hapësira për administratën dhe recepsionin” thuhet në dokumente./ VoxNews
