Inspektoriati Kombëtar i Mbrojtjes së Territorit ka ndërmarrë këtë të enjte një aksion në zonën e “Ujit të Ftohtë” në qytetin e Vlorës, ku ka shëmbur një strukturë betoni, e cila u ndërtua një javë më parë në një tokë publike nga ndërtuesi Moisi Lazaj, i kompanisë “Lazaj 2002”.
Pasi hodhi betonin për të ndërtuar në tokën publike pallat në një nga zonat më të shtrenjta të Vlorë, Moisi Lazaj i hodhi dhe, për ta fshehur pas raportimeve mediatike.
Struktura ishte bërë gati për vendosjen e pilotave për një ndërtesë disa katëshe pa leje, teksa aksioni i IKMT-së vjen pas denoncimeve mediatike.
Gjithashtu, mësohet se IKMT ka regjistruar dhe një kallzim penal në drejtim të ndërtuesit Moisi Lazaj për zaptim të pronës publik dhe ndërtimi pa leje, si dhe i është pezulluar leja e ndërtimit për dy muaj.
Burime bëjnë me dije se firma “Lazaj 2002” ka marrë një leje ndërtimi për një pallat disa katësh në zonën e “Ujit të Ftohtë”, ndërkohë që struktura po shembet nga IKMT ishte vendosur duke zaptuar një sipërfaqe mbi 500 metra katror jashtë lejes së ndërtimit në një tokë shtetërore.
Lazaj këtë pronë publike tentoi ta merrte përmes Këshillit Bashkiak të Vlorës, duke përdorur kryebashkiakun Ermal Dredha. Qëllimi ishte që prona t’i kalojë fillimisht Bashkisë së Vlorës dhe më pas, në një mbledhje tjetër, t’i transferohet firmës “Lazaj 2002”.
Kjo kërkesë u rrëzua një javë më parë nga Këshilli Bashkiak, teksa do të trajtohet sërish në mbledhjen e sotme, nëse do t’i jepet ose jo ndërtuesit toka shtetërore.
Me pak fjalë, ndërtuesi Moisi Lazaj dhe kryebashkiaku Ermal Dredha kërkojnë që përgjegjësinë penale t’ia kalojnë anëtarëve të Këshillit Bashkiak.
