Kancelari gjerman, Friedrich Merz, tha se sistemi mbrojtës duhet të rikthehet në prioritetin e qeverisjes së tij.
“Bundeswehr-i duhet të rikthehet në qendër të shoqërisë sonë”, deklaroi kancelari gjerman Friedrich Merz gjatë fjalimit të tij në Ditën e Industrisë në Berlin.
Ai shtoi se pezullimi i shërbimit të detyrueshëm ushtarak ishte një gabim, duke reflektuar mbi situatën aktuale të sigurisë.
“Me gjithçka që dimë sot, ishte një vendim i gabuar,” theksoi Merz, duke kërkuar një rol më të theksuar për ushtrinë gjermane në jetën publike.
Në të njëjtën linjë, Ministri i Mbrojtjes, Boris Pistorius, tha për ZDF se Gjermania po përjeton një ‘kthesë historike’, duke iu referuar rritjes së ndjeshme të buxhetit të mbrojtjes. Ai u shpreh se kjo nuk është një lëshim ndaj presionit të SHBA-së apo favor për ish-presidentin Donald Trump, por një nevojë reale e mbrojtjes kombëtare.
Pistorius theksoi gjithashtu se gjatë tre dekadave të fundit, Gjermania ka bërë ‘investime minimale në forcat e armatosura dhe në kapacitetin e saj parandalues’, duke nënvizuar rëndësinë e rritjes së mbështetjes për Bundesëehr-in në një kontekst të sigurisë gjithnjë e më të paqëndrueshëm.
Kujtojmë se shërbimi i detyrueshëm ushtarak në Gjermani u pezullua në vitin 2011 gjatë mandatit të Angela Merkel, por ende mbetet pjesë e Kushtetutës.
Rikthimi i tij është i mundur me një shumicë të thjeshtë parlamentare nga koalicioni qeverisës i Bashkimit të Krishterë dhe Social Demokratëve.
Megjithatë, qëndrimet politike ndaj këtij rikthimi janë të ndara.
Bashkimi Kristian (CDU/CSU) mbështet fuqishëm shërbimin e detyrueshëm, ndërsa Partia Socialdemokrate (SPD) është më e rezervuar, duke preferuar një qasje vullnetare, siç është reflektuar edhe në marrëveshjen e koalicionit.
Ndërkohë, opinioni publik gjerman tregon mbështetje në rritje për këtë ide. Sipas një sondazhi të YouGov për Agjencinë Gjermane të Lajmeve (dpa), 54% e qytetarëve janë pro rivendosjes së shërbimit të detyrueshëm ushtarak.
Megjithatë sipas sondazheve, të rinjtë e preferojnë më pak shërbimin e detyrueshëm ushtarak, kurse moshat e mesme dhe të moshuara e kërkojnë atë. Syri.net-Kathimerini
