Presidenti i Shteteve të Bashkuara, Donald Trump, ka komentuar për herë të parë nga Samiti i NATO-s situatën e tensionuar në Lindjen e Mesme, pas sulmit të fundit amerikan ndaj objektivave bërthamore në Iran.
Gjatë fjalës së tij, Trump e cilësoi ndërhyrjen amerikane si një “sulm masiv dhe preciz”, i cili sipas tij ka rikthyer balancën dhe ka hapur rrugën për paqe në rajon.
“Çdo gjë ka mbaruar në Lindjen e Mesme. Nuk mendojmë se Izraeli dhe Irani do të sulmojnë sërish njëri-tjetrin,” u shpreh Presidenti amerikan.
Trump theksoi se ky veprim ushtarak parandaloi Iranin nga sigurimi i një arme bërthamore dhe sipas tij, rindërtoi besueshmërinë e forcës parandaluese të SHBA-së.
Në të njëjtën deklaratë, ai zbuloi se të gjitha 14 raketat që synonin bazën amerikane në Katar janë rrëzuar me sukses, duke shmangur çdo pasojë.
Deklaratat e Trump vijnë në një kohë kur bota po ndjek me vëmendje zhvillimet në Lindjen e Mesme, pas shkëmbimeve të ashpra mes Iranit dhe Izraelit dhe përfshirjes së forcave amerikane në mbështetje të aleatit izraelit. Samiti i NATO-s në Hagë pritet të sjellë qëndrime të përbashkëta të aleancës për sigurinë rajonale dhe përgjigjen ndaj kërcënimeve të ardhshme.
