Në përfundim të Samitit të NATO-s në Hagë, kryeministri i Spanjës, Pedro Sanchez, ka theksuar se vendi i tij do të përmbushë angazhimet ndaj aleancës, por konsideron se shpenzimet aktuale prej 2% të Prodhimit të Brendshëm Bruto janë të mjaftueshme dhe të qëndrueshme për ekonominë spanjolle.
Sanchez, i cili javën e kaluar kërkoi përjashtimin e Spanjës nga objektivi i ri i NATO-s për të shpenzuar 5% të PBB-së në mbrojtje deri në vitin 2035, u shpreh se Madridin e karakterizon një balancë mes sigurisë dhe mirëqenies sociale.
“NATO dhe Spanja fitojnë kur sigurojmë paqen dhe mirëqenien për qytetarët tanë,” tha Sanchez, duke falënderuar aleatët për respektimin e sovranitetit spanjoll.
Në këtë samit, vendet anëtare të NATO-s ranë dakord për një objektiv të ri që kërkon investimin e 5% të PBB-së në fushën e sigurisë dhe mbrojtjes gjatë një dekade, ku 3.5% do të shkojnë për shpenzime ushtarake dhe 1.5% për investime në infrastrukturë kritike dhe siguri.
Megjithatë, ky objektiv i ri është sfidues për shumë vende evropiane, përfshirë Spanjën, e cila e sheh si të tepruar rritjen e kërkuar të shpenzimeve ushtarake.
Sekretari i Përgjithshëm i NATO-s, Mark Rutte, ka kundërshtuar kërkesën e Spanjës për përjashtim, por gjithashtu ka treguar fleksibilitet për të ruajtur bashkëpunimin dhe për të dhënë një fitore diplomatike për Presidentin amerikan Donald Trump, duke bërë që samiti të zhvillohet pa tensione të mëdha.
