Procesi gjyqësor ndaj reperit dhe producentit të njohur amerikan Sean “Diddy” Combs po i afrohet fundit. Prokuroria federale në Nju Jork ka mbyllur fazën e paraqitjes së provave, ndërsa mbrojtja ka vendosur të mos thërrasë asnjë dëshmitar dhe as vetë Combs nuk do të dëshmojë në sallën e gjyqit.
Pas më shumë se gjashtë javësh seanca dhe 34 dëshmitarëve të thirrur nga prokuroria, juria pritet të dëgjojë argumentet përfundimtare të enjten, ndërsa vendimi mund të jepet javën e ardhshme.
Sean Combs përballet me akuza të rënda për konspiracion kriminal, shantazh dhe trafikim seksual. Sipas prokurorisë, ai dyshohet se ka përdorur perandorinë e tij muzikore si një rrjet kriminal për të shfrytëzuar seksualisht gratë për dekada.
Avokatët e tij, të udhëhequr nga Marc Agnifilo dhe Alexandra Shapiro, paraqitën një mocion për pushimin e çështjes, duke argumentuar se prokuroria nuk arriti të vërtetonte përfshirjen kriminale të Combs dhe se aktet e tij lidheshin me “jetën personale dhe marrëdhëniet e tij intime”, jo me aktivitete kriminale të organizuara.
“Ky është vendimi im, Zotëri,” u përgjigj Combs kur gjykatësi amerikan Arun Subramanian e pyeti nëse refuzimi për të dëshmuar ishte i ndërgjegjshëm. Ai shtoi: “Po shkoj shumë mirë. Ju faleminderit, po bëni një punë të shkëlqyer.”
Gjykatësi konfirmoi se juria nuk duhet të ndikojë nga mungesa e dëshmive nga ana e mbrojtjes, pasi barra e provës bie mbi prokurorinë.
Seanca e së mërkurës u zhvillua pa praninë e jurisë dhe përfshiu shqyrtimin e disa çështjeve procedurale dhe deklaratave të mëparshme të dëshmitarëve. Prokuroria dhe mbrojtja do të kthehen në sallë të enjten për të dhënë fjalët përfundimtare përpara se juria të tërhiqet për vendimin.
