Policia e Kufirit dhe Migracionit në Korçë ka arrestuar një shtetas të huaj, i cili akuzohet se organizonte dhe zhvillonte veprimtarinë e dhënies ndihmë për kalimin të kufijve në mënyrë të paligjshme, kundrejt pagesës.
Në kuadër të operacionit të koduar “Lugina 3” është vënë në pranga shtetasi algjerian A. B., 20 vjeç, mbi të cilin rëndon akuza për veprën penale “Ndihma për kalim të paligjshëm të kufijve”.
20-vjeçari është kapur në flagrancë gjatë natës në fshatin Kapshticë, duke shoqëruar një shtetas algjerian.
“Nga hetimet dyshohet se ky shtetas, në bashkëpunim me shtetas të tjerë algjerianë, ndihmonte emigrantë nga Vendet e Treta, kundrejt pagesës, që të hynin ilegalisht në Shqipëri, nëpërmjet kufirit tokësor me Greqinë, dhe më pas për të kaluar në vendet e BE-së, nëpërmjet Malit të Zi. Vijojnë hetimet për dokumentimin e plotë të kësaj veprimtarie kriminale, si dhe për identifikimin dhe kapjen e shtetasve të tjerë të përfshirë.” – thuhet në njoftimin e Policisë.
Materialet procedurale i kanë kaluar Prokurorisë së Korçës për veprime të mëtejshme.
