Kina ka deklaruar ditën e sotme se është “proaktive” në luftën kundër trafikut të drogës.
Një reagim i tillë vjen pasi Pekini shtrëngoi kontrollet mbi dy kimikate të përdorura në prodhimin e fentanilit, një opioid sintetik që ka shkaktuar vdekje, veçanërisht në Shtetet e Bashkuara, raporton “L’Orient – Le Jour”.
Tregtia e fentanilit po tensionon marrëdhëniet Kinë – SHBA
Uashingtoni akuzon Pekinin se nuk po bën mjaftueshëm për të luftuar prodhimin dhe eksportin e paligjshëm të përbërësve të drogës gjë që Kina e mohon.
Kështu, autoritetet kineze deklarojnë se kanë shtuar dy substanca që mund të përdoren për të prodhuar ilaçe, në një listë të përbërjeve kimike. Kjo gjë nis nga data 20 korrik. Bëhet fjalë për substancat piperidon-4-dhe 1-boc-4-piperidon.
Zëdhënësi i Ministrisë së Jashtme Guo Jiakun, i pyetur në një konferencë për shtyp nëse kjo ishte një masë e marrë në bashkëpunim me Shtetet e Bashkuara, u shpreh se ishte “një iniciativë e pavarur e ndërmarrë nga qeveria kineze për të përmbushur detyrimet e saj si nënshkruese e konventave të Kombeve të Bashkuara për kontrollin e drogës”.
Kjo “pasqyron qëndrimin proaktiv të Kinës”, shtoi Jiakun.
Tarifat mes SHBA-Kinë
Pekini dhe Uashingtoni ranë dakord për një armëpushim të përkohshëm tregtar pasi rritjet e njëpasnjëshme të tarifave nga të dyja palët, ndërprenë zinxhirët globalë të furnizimit.
Në maj, të dyja palët ranë dakord të ulin në mënyrë drastike këto mbingarkesa tarifore për 90 ditë.
Megjithatë, niveli i tarifave amerikane për mallrat kineze mbetet më i lartë, për shkak të një mbingarkese prej 20% të zbatuar për të ushtruar presion mbi Pekinin dhe eksportet e tij të kimikateve të përdorura për të prodhuar fentanil.
“Shtetet e Bashkuara shpërfillin vullnetin e mirë të Kinës dhe kanë vendosur tarifa të paarsyeshme në lidhje me fentanilin. Nëse Shtetet e Bashkuara duan vërtet të bashkëpunojnë me Kinën, ato duhet të pranojnë faktet objektive, të korrigjojnë gabimet e tyre dhe të angazhohen në dialog me Kinën në bazë të barazisë, respektit dhe përfitimit të ndërsjellë”, tha Jiakun.
Dhjetëra mijëra njerëz vdesin çdo vit në Shtetet e Bashkuara nga marrja e opioideve si fentanili.
