SPAK shtyn afatin për zgjedhjen e kreut të ri të BKH-së, ja shkaku

Prokuroria e Posaçme (SPAK) ka shtyrë deri më 24 Qershor (nesër, e martë) afatin e fazës së verifikimit paraprak të 13 kandidatëve që kanë aplikuar në garën për të marrë drejtimin e Byrosë Kombëtare të Hetimit (BKH), pas përfundimit të mandatit të drejtueses aktuale Aida Hajnaj.

Mediat raportojnë se shkak për shtyrjen e afatit është bërë dorëzimi jo i rregullt i dokumentacionit nga shumica e kandidatëve. Mësohet se nga 13 kandidatë gjithsej, vetëm 2 prej tyre kanë dorëzuar të gjithë dokumentacionin e kërkuar për fazën e parë të përzgjedhjes.

Mes emrave në garë për kreun e BKH-së spikat ai i ish-drejtori të Përgjitshëm të Policisë së Shtetit, Gledis Nano, zëvendësdrejtor i BKH-së, Joni Keta apo oficeri Mentor Cuku dhe ish-shefi i Policisë, Elton Kërluku.

Po ashtu, në garë për të marrë drejtimin e BKH-së është edhe drejtori i Përgjithshëm të Agjencisë Kombëtare të Mbrojtjes Civile, Haki Çako, i cili më herët ka qenë edhe drejtor i Përgjitshëm i Policisë së Shtetit.

Pjesë e listës janë edhe prokurori i Tiranës Andi Pogaçe dhe ish-prokurori i Shkodrës i shkarkuar nga vetingu Astrit Halilaj. Po ashtu në garë është edhe Artur Beu, i cili garonte edhe 5 vite më parë, kur u zgjodh Aida Hajnaj. Në 2015-ën, ai shërbeu si specialist i marrëdhënieve ndërkombëtare në Interpol.

Emrat e tjerë nga radhët e Policisë në garë për kreun e BKH-së janë Gentian Ndoi, i cili prej disa vitesh mban postin e drejtor për Hetimin e Krimit Ekonomik dhe Financiar në Drejtorinë e Përgjithshme të Policisë së Shtetit, si dhe Gentjan Shehaj, ish-drejtues i Policisë së Vlorës dhe Lezhës, teksa aktualisht është drejtor i kurrikulave në Akademinë e Sigurisë.

Në garë është edhe inspektori i AMP-së, Maoricio Sheldija, apo edhe Nevrus Ndregjoni, i cili aktualisht është oficer i policisë gjyqësore në Elbasan.

E vetmja kandidate grua në garë për të marrë drejtimin e Byrosë Kombëtare të Hetimit është Marinela Pilinci, e cila është oficere e Policisë Gjyqësore. Ndërkohë, Miklovan Kanani është emër i panjohur.

Pas mbylljes së aplikimeve, nisi procesi që kalon në fazën e verifikimit paraprak, gjatë së cilës, Komisioni i Përzgjedhjes do të shqyrtojë dokumentacionin e paraqitur nga kandidatët për të vlerësuar përmbushjen e kushteve ligjore dhe kritereve të përcaktuara në ligjin “Për organizimin dhe funksionimin e institucioneve për të luftuar korrupsionin dhe krimin e organizuar”.

Kandidatët që kalojnë fazën e verifikimit paraprak do të ftohen për të marrë pjesë në fazat pasardhëse të procesit. Procesi i emërimit të drejtorit të ri do të kryehet duke kaluar në 7 faza, testi i arsyetimit logjik, kontrolli mjekësor, testi fizik, ese me shkrim, intervistë dhe më pas bëhet verifikimi i figurës, deklarimi i aseteve dhe testi i poligrafit.

Drejtueses aktuale të BKH-së, Aida Hajnajt, i përfundon mandati 5-vjeçar më 31 Gusht. Edhe pse kishte shprehur që më 28 mars interesin për një tjetër mandat, ajo u përjashtuar nga e drejta për rikandidim, pasi nuk dorëzoi dokumentacionin e kërkuar brenda afatit të caktuar nga Komisioni i Përzgjedhjes deri më 7 maj.

13 kandidatët në garë për kreun e BKH-së janë:

1. Andi Pogaçe
2. Artur Beu
3. Astrit Halilaj
4. Elton Kërluku
5. Gentian Ndoi
6. Gentjan Shehaj
7. Gledis Nano
8. Haki Çako
9. Joni Keta
10. Maoricio Sheldija
11. Marinela Pilinçi
12. Miklovan Kanani
13. Nevrus Ndregjoni