Është koha e vjeljes së bostanëve, frutit më të kërkuar të stinës së verës. Pikat e grumbullimit në Divjakë po punojnë me kapacitet të plotë dhe kërkesa është më e madhe se prodhimi. 90% e sasisë është mbjellë për eksport.
Kosova është tregu kryesor për eksportin e shalqirit nga Divjaka. Ramadan Jashari vjen të paktën katër herë në javë nga Prishtina për të ngarkuar kamionin e tij me bostanë. Mbi 64 tonë është ngarkesa që merr gjatë një jave me produkte nga fushat e Myzeqesë.
Ndërsa eksporti po ecën me ritme të mira për pikat e grumbullimit, prodhuesit janë në hall me çmimin. Nëse kalon në rrethrrotullimin e Cermës, syri të zë tendat për shitjen e shalqirit. Janë fermerët të cilët atë që nuk e eksportojnë e tregtojnë vetë në rrugë. Ylli Vrapi tregon se po shet me 30 lekë shalqirin e tij, duke refuzuar ta çojë për eksport për shkak të çmimit të ulët deri në 13 lekë për kilogramë.
Pavarësisht kërkesës së lartë për bostanë, çmimi është ulur. Fermerët ngrenë pretendimin se i nxehti po u shkakton probleme me prodhimin. Temperaturat e larta kanë pjekur të gjithë prodhimin e fushës menjëherë, duke sjellë çrregullimin e tregut.
Eksporti i shalqirit kryesisht bëhet me vendet e Ballkanit ku Kosova dhe Maqedonia zënë peshën kryesore. Për të rritur fitimet e tyre, fermerët kanë kultivuar shalqi në fusha edhe në sera, duke bërë që prodhimi i parë të dalë në maj dhe të përfundojë në shtator. Divjaka është zona e parë në rajonin Ballkanik që del me prodhimin gati për shitje. Niveli i çmimit bie ndjeshëm në muajt e verës, kur është piku i shitjeve./Klan News
