Ilir Meta do të paraqitet sot në orën 11:30 në Gjykatën e Posaçme Kundër Krimit dhe Korrupsionit, ku do të kërkojë zbutjen e masës së sigurisë që i është caktuar.
Ndërkohë, burimet për “Euronews Albania” bëjnë me dije se është zbuluar një episod i ri korrupsioni, i cili i atribuohet Metës dhe ish-bashkëshortes së tij, Monika Kryemadhit. Bëhet fjalë për një kartë tjetër bankare që rezulton se është përdorur për blerje dhe shpenzime të ndryshme.
Mësohet se karta i është vënë në dispozicion Metës dhe Kryemadhit nga biznesmeni Adrian Shatku. Nga hetimet paraprake më herët u zbulua një kartë tjetër “Amerikan Express” që ishte përdorur dhe vënë në dispozicion nga i njëjti biznesmen.
Po ashtu, SPAK pritet të saktësojë edhe episodin mbi akuzën e lobimit të ish-LSI-së, pasi nga letërporositë janë zbuluar të dhëna të reja lidhur me pagesat dhe kontratën përkatëse.
Ish presidenti Meta akuzohet nga SPAK për korrupsion, pastrim parash dhe fshehje pasurie në lidhje me çështjet CEZ-DIA, lobimin e ish-LSI në SHBA dhe shpenzimet e familjes së tij.
Sipas Prokurorisë së Posaçme, Ilir Meta akuzohet se ka ndikuar për lidhjen e marëveshjes mes CEZ dhe kompanisë DIA që drejtohej nga Kastriot Ismailiaj, duke përfituar shuma parash nga Ismailiaj.
Po kështu, SPAK ka dyshime se Meta nuk ka deklaruar burimin e parave për lobimin në amerikë të partisë Levizja Socialsite për Integrim si dhe burimi e parave për disa ndërhyrje kirurgjikale.
